Styrofoam, plastic idili sa mga okasyon
CEBU, Philippines — Nagduso og ordinansahon ang usa ka konsehal sa Siyudad sa Sugbo nga magdili sa mga styrofoam ug mga single-use plastic sa mga publikong okasyon sa siyudad.
Si Konsehal Alvin Dizon nagkanayon nga ang siyudad kinahanglan nga makiglambigit sa pribado nga sektor sa paghipos sa basura ug pagpangita sa malungtarong pamaagi ug paggamit sa mga materyales nga dili plastik ug i-recycle.
Anaa pa sa committee on laws, ordinances, and styling sa konseho ang ordinasahon ni Dizon.
Ang publikong mga kalihukan naglakip sa kapistahan, kalingawan sama sa mga konsiyerto, medical mission, paglimpyo sa sapa, pamaligya og pagkaon sama sa mga merkado, rally ug uban pa nga kini mahimong supak sa balaud alang sa mga nag-organisar sa kalihukan ug mga partisipante nga mogamit og plastik nga gamit sama sa grocery bag, cups, plastik nga botelya, balon, styrofoam ug packaging alang sa tanan nga mga klase sa pagkaon ug ilimnon.
Ang gisugyot nga multa asa kalapasan sa mga event organizers ug mga partisipante mao ang P1,000; P3,000, ug P5,000 alang sa una, ikaduha ug ikatulo nga kalapasan.
Hinoon ang mga organizers ug mga partisipante adunay kapilian nga maghatag og serbisyo sa komunidad ug ipailawom sa seminar kun dili makabayad sa multa.
Alang sa mga matinumanon nga organizers, ang gisugyot nga ordinansa nag-ingon nga sila makatagamtam sa incentive gikan sa pagbayad sa amusement tax.
Ang Cebu City Environment and Natural Resources Office, Cebu City Parks and Playgrounds Commission ug Prevention, Restoration, Order, Beautification and Enhancement (PROBE) Team ang gitahasan nga mopatuman sa maong ordinansahon kung maaprobahan na sa konseho sa siyudad. (/GMR)(BANATNEWS)
- Latest
