Siyudad gisingil sa P1.3 milyon sa COA

CEBU, Philippines — Gihangyo sa Commission on Audit ang Department of Transportation nga pangayoon sa kagamhanan sa Dakbayan sa Sugbo ang P1.3 milyones nga interest gikan sa wala gigamit nga pondo nga P430 milyones alang sa Cebu Bus Rapid Transit Project.

Sa annual audit report, girekomendar sa COA ang DOTr nga hangyuon ang siyudad nga ihatag ang binuwan nga report sa paggamit sa pondo ug kalambuan sa trabaho sa multi-billion nga BRT Project.

Niadtong Abril 26, 2017, ang kagamhanan sa Dakbayan sa Sugbo nakadawat og P460,260,500 alang sa pasiunang pondo alang sa daghang pagkuha sa mga kabtangan nga apektado sa pagpatuman sa proyekto sa BRT.

Kaniadtong Disyembre 2018, nasayran sa COA nga ang interes sa wala magamit nga P460 milyones nga pondo nakaabot sa P1,347,585.24 ug kini ang ipa-remit ngadto sa Bureau of Treasury.

Si acting Cebu City Treasurer Arlene Rentuza nagkanayon nga ang kwarta wala gigamit sa siyudad.

Si Rentuza niingon nga wala siya kadawat bisan unsang komunikasyon gikan sa DOTr alang niini.

Siya nagtuo sab nga basin si Atty. Jerone Castillo kinsa maoy itudlo nga city treasurer ni Mayor Edgardo Labella ang nakahibalo niini.

Si Castillo niingon nga ang siyudad nangayo na sa DOTr nga mag-isyu og clarificatory memorandum labot niini.

Matud ni Castillo nga gusto ni Labella nga ipatuman ang proyekto maong kinahanglan niya ang katin-awan gikan sa DOTr basin og dunay legal nga kwestiyon ang maong kwarta. (GMR)(BANATNEWS)