Bag-ong EO sa Sinulog Board giluwatan

CEBU, Philippines – Niluwat og laing executive order si Cebu City Mayor Edgardo Labella nga nagmugna sa Cebu City Sinulog Governing Board nga mahiuyon sa Sinulog Foundation Inc. sa pag-andam alang sa kapistahan sa Senyor Santo Niño.

Nasayran nga wala nauyoni sa chairman sa SFI nga si Bise Mayor Michael Rama ang unang EO ni Labella.

Matud ni Labella nga ang siyudad magpadayon sa paghan-ay sa peace and order, traffic improvement ug disaster-preparedness sa Sinulog Festival.

“After some discussions with some people, we will recognize the role of the Sinulog Foundation Inc.,” sigun niya.

Ubos sa bag-ong EO, matud ni Labella nga ang mga gimbuhaton sa Sinulog Governing Board mao ang pag-coordinate sa tanang kalihukan sa Sinulog Festival lakip na ang kalimpyo, kalinaw ug kahusay, pagpakig-alayon sa SFI ug mga hingtungdang ahensiya sa gobiyerno, ug mga palisiya tumong sa kalampusan sa Sinulog Festival.

Si Labella molingkod isip chairman sa board ug mga miyembro niini ang gobernador sa Lalawigan sa Sugbo, walo ka sakop nga itudlo sa Mayor; lima ka sinaligan sa SFI, duha ka sakop sa konseho sa siyudad, director sa Cebu City Police Office, Department of Education, rector sa Basilica Minore del Sto. Niño, regional director sa Land Transportation Franchising and Regulatory Board, pangulo sa Cebu City Transportation Office, regional director sa Land Transportation Office ug Department of Health, ug commander sa Central Command sa Armed Forces of the Philippines. (/GMR)(BANAT NEWS)