Polio outbreak gideklarar sa DOH tibuok nasud

CEBU, Philippines — Gideklarar kagahapon sa Department of Health (DOH) ang nationwide polio outbreak human sa kompirmasyon nga dunay natakboyan niini ug nibalik karon ang maong kagaw sa Pilipinas human sa nakalabay nga 19 ka tuig.

Sa report sa Philstar.Com, si Health Secretary Francisco Duque III nagkanayon nga dunay usa ka 3-anyos nga batang babaye didto sa Lanao del Sur ang kompirmadong natakboyan og vaccine-derived poliovirus 2.

Samtang sa gikuhang samples sa mga kanal sa Tondo, Manila ug sa Davao City may nakita sab nga presensya sa poliovirus.

“A single confirmed case of vaccine-derived poliovirus 2 (VDPV2) or two positive environmental samples that are genetically linked in different locations is considered an epidemic in a polio-free country,” sumala pang Doque.

Ang director sa Epidemiology Bureau sa DOH nga si Ferchito Avelino miingon nga ang batang natakboyan didto sa Lanao del Sur wala mabakunahi batok sa polio, samtang nabuhi ang bata apan naparalisar ang lawas niini.

Ang DOH miingon nga niadto pang 2000 gideklarar ang Pilipinas nga polio-free country apan karon bisan og usa pa lang ang kompirmado ug dunay mga lugar nga lagyo ang distansya nga gikakitaan og poliovirus, paigo na kini nga rason aron magdeklarar og outbreak.

Nakig-alayon karon ang DOH  sa mga local government units ug ubang ahensya sa gobiyerno aron mangandam ug  mohimo’g mga lakang batok sa pagdaghan pa gyud sa matakboyan niini.

Giawhag karon ni Doque ang mga ginikanan nga pabakunahan gyud dayon ilang mga anak batok sa polio aron dili makalas o mabakol sa tibuok kinabuhi ilang mga anak.

Apil sa pagsigurong di matakboyan niini mao ang kalimpyo sa lawas, kanunayon gyud ang paghugas sa mga kamot, limpyohan ang mga pansayan, limpyong tubig mainom ug tarungon og luto ang pagkaon.

Si Health Undersecretary Eric Domingo miingon nga kadaghanan sa mga nasakit og polio asymptomatic ug baskog tan-awon, apan carriers ug makatakod gihapon sila niini sud sa 60 ka adlaw ilabi na niadtong wala gyud mabakunahi batok niini.

Matud pang Domingo daghang mga Filipino ang kuwang sa proteksyon batok sa poliovirus tungod kay gamay lang ang nagpabakuna.

Ang DOH miingon nga dunay tulo ka klaseng poliovirus ug ang nadiskubrehan karon mao ang Type 1 poliovirus sa Manila ug type 2 ang sa Davao.

Gawas sa wala pagpabakuna, uwahi na kaayong na-detect ang sintomas ug ang substandard sanitation practices ang posibleng hinungdan sa pagbalik sa maong sakit.

Ang representante sa World Health Organization (WHO) nga si Rabindra Abeyasinghe miingon nga hagbay rang napatay ang vaccine-derived polio type 2 sa tibuok kalibotan niadtong 2015.

“The polio case from Lanao del Sur raises the issue on where the virus came from. It is important to have a 95 percent polio vaccine coverage because other people could pick up the virus,” matud ni Abeyasinghe.

Ang Pilipinas kataposang nakatala og natakboyan og polio niadto pang 1993. (/IBM)(BANATNEWS)