Magtiayong mananagat wala pa gihapon nakauli

CEBU, Philippines — Magtiayon nga nagkuyog sa pagpanagat sa kadagatan sa Oslob wala pa gihapon igkita hangtod ning pagbalita human sila gi-report ngadto sa kapolisan nga wala na makabalik gikan sa nanagat sukad niadtong Biyernes sa buntag. Padayon karong gipangita ang magtiayong sila si Samuel Caldeno, 52, ug asawa nga si Olympia Caldeno, 45, nagpuyo sa Barangay Lagundi sa maong lungsod.

Matud pa ni Police Corporal Rolando Buquiran, Desk Officer sa Oslob Police Station padayon ang ilang search and rescue operation sa kadagatan.

Nitabang na kanila sa pagpangita ang mga sakop sa Philippine Coast Guard-Cebu, uban sa mga lokal nga emergency responders sa barangay.

Base sa nakuha nilang impormasyon gikan sa kabanay sa magtiayon, nilawod ang magtiayon alas-3 sa kaadlawon niadtong adlaw nga Biyernes.

Apan hangtud ning pagbalita wala na mabalik ang duha ug nabalaka ang mga kabanay nga dunay dautang nahitabo kanila sa lawod. Sumala pa ni Buquiran naandan na nga alas 7 o alas 9 sa buntag pa nakauli ang duha matag managat kini sa kaadlawon. Human naabtan og 24 oras nga wala makauli ang duha gikonsiderar na sila sa kapolisan nga missing. Padayon usab ang pakig-alayon sa mga otoridad ngadto silingan nga mga probinsya ug kalungsuran diin posibleng napadpad ang magtiayon.

Matud pa nga naanad na ang duha nga maguban sa pagpanagat kun dili makakuyog ang ilang mga anak.

Ang kapolisan sa Oslob nanawagan sa tanan aron matabangan pagpapangita sa managtiayon ug i-report dayon kanila. Malaumon gihapon ang pamilya sa magtiayon nga makit-an ug mauli gihapon ang duha ilabi na pipila sa mga anak niini mga gagmay pa. (/IBM)(BANATNEWS)