Pikas habig sa taytayan sa Mananga gibuksan na

CEBU, Philippines — Human sa usa ka tuig nga wala paagii ang usa ka habig sa taytayan sa Mananga niining ulahi lang gitugot na nga maagian sa pagbalik ang maong taytayan.

Niadtong Biyernes nahuman sa contractor ang kataposang pag-aspalto sa nahisgutang taytayan sa Barangay Tabunok, Dakbayan sa Talisay.

Ang taytayan sa Mananga nga gitagana sa mga sakyanan paingon sa Siyudad sa Sugbo ang gibuksan na hinungdan nga nilugak ang dagan sa trapiko sa lugar.

Si Mayor Gerald Anthony “Samsam” Gullas, Jr. ang nagsige og follow up sa contractor ug sa Department of Public Works and Highways (DPWH) kabahin sa paghuman sa kaugmaran sa taytayan.

Si Jonathan “Joy” Tumulak, pangulo sa City of Talisay-Traffic Operations and Development Authority (CT-TODA) ug kadagkoan sa DPWH ang diha sa lugar atol sa pagbukas pagbalik sa taytayan.

Adunay namatikdan nga pagpangliki sa taytayan apan si Engineer Edgar Tabacon, direktor sa DPWH-7 nipasalig sa tanan nga luwas na kining agian bisan sa mga dagko nga sakyanan.

Samtang si Tumulak nagkanayon nga iyaha na usab nga gipahibawo ang taga Cebu City Traffic Office (CCTO) labot niini aron mabalik na sa naandan nga rota ang mga bus. (/BDB)(BANATNEWS)

a