Dakbayan sa Sugbo ug Mandaue manglimpiyo sa sapa

CEBU, Philippines – Ang mga opisyal sa Siyudad sa Sugbo ug Mandaue magtagbo sa utlanan sa Mahiga Creek ug Subangdaku River karong adlawa aron ipakita ang ilang commitment sa paglimpiyo sa mga sapa.

Gibutyag ni Cebu City Mayor Edgardo Labella nga ang duha ka siyudad ang nag-umol og komitiba kauban ang mga miyembro sa disaster prevention group ug uban pa alang sa lapad nga pagpanglimpiyo.

Kini ang ikaduha nga higayon nga ang administrasyon ni Labella nag-schedule og massive cleanup sa mga sapa nga giingong usa sa mga short-term nga solusyon aron masulbad ang nagkagrabe nga problema sa pagbaha.

Gihangop ni Labella ang pagtabang ni Mandaue City Mayor Jonas Cortes nga aron limpiyohan ang mga sapa diha sa duha ka nahisgutang mga siyudad.

Sayo pa, ang buhatan sa city administrator niluwat og memorandum alang sa tanan nga mga empleyado sa city hall nga moapil sa paglimpiyo sa Mahiga Creek karong adlawa.

Ang pagpanglimpiyo gilangkuban kini sa 11 ka stations nga mao ang Sitio Mayupay Tree sa Ubos sa Mahiga sa Barangay Banilad, Banilad basketball court, Mahiga Bridge sa Governor Cuenco Avenue, Coast Pacific Road sa Barangay Kasambagan, F. Cabahug Bridge, Subangdaku Bridge, San Isidro basketball court, Urot Bridge Mabolo National High School, Abattoir Tulay, M. Logarta Bridge tupad sa SM Hypermart ug CPA Bridge.

Matud ni Atty. John Jigo Dacua, pangulo sa Cebu City Environment and Natural Resources Office nga gihangyo sa iyang buhatan ang Bantay Dagat Commission nga mag-apod-apod sa duha ka pump boat sa paghinlo tungod kay adunay mga lawom nga bahin sa sapa. (/BDB)(BANAT NEWS)