Speed limit planong ipatuman sa talisay
CEBU, Philippines – Nagtinguha si Talisay City Mayor Gerald Anthony “Samsam” Gullas Jr. nga magpatuman og speed limit sa mga sakyanan.
Kini human ilang nakita nga kasagaran sa disgrasya gumikan sa pagpaturagas sa mga drayber sa ilang pagpadagan sa sakyanan.
Si Jonathan “Joy” Tumulak, traffic czar sa dakbayan, nitataw nga sa niaging semana ilang nakuha ang mga disgrasya sa South Road Properties (SRP) pinaagi sa mga CCTV cameras nga ilang gipangmontar sa matag eskina hinungdan sa iyang pagrekomendar sa speed limit.
Gawas niana, siya naglaraw nga mopalit og speed gun kun pananglit mahimo na ang ordinansa niini.
Si Gullas nitataw nga iya unang konsultahon ang konseho sa ilang laraw aron mahan-ay ang balaudnon nga magprotehir gihapon sa mga motorista.
Hinoon ang batan-ong mayor nipasabot nga sa dili pa nila hulmahon ang ordinansa iya una nga estoryahon si Cebu City Mayor Edgar Labella kun unsay panahom niini sa iyang laraw aron magtakdo ang balaudnon nga ipatuman sanglit sumpay man ang SRP sa Talisay ug Siyudad sa Sugbo.
Sa niaging tuig hangtud sa unang buwan sa tuig nakatala ang Dakbayan sa Talisay og disgrasya nga moabot sa 444 ug ang 12 niini ang may nakalas nga kinabuhi. (/GMR)(BANAT NEWS)
- Latest
