Pag-IBIG loyalty card-plus gilusad
CEBU, Philippines — Gilusad sa Pag-IBIG Fund sa Sugbo ang ilang Loyalty Card-Plus diin pwede nga makuha sa mga miyembro sa tanan nilang sangang buhatan.
Matud ni Pag-IBIG Fund Chief Executive Officer Acmad Rizaldy Moti nga una nilang gilusad ang Loyalty Card-Plus sa kaulohan diin 50,000 ka cash cards ang ilang napangapod-apod.
Ang maghupot sa maong card makapahimulos og diskwento gikan sa nagkadaiyang establisemento nga partner sa ahensiya.
Ang mo-apply og multi-purpose loan o kaha calamity loan nga miyembro, ang kwarta adto kini ideposito sa Loyalty Card-Plus tungod kay magsilbi sab kini nga cash card.
Magamit sab ang maong card sa pagbayad sa mga pinalit sa groceries ug uban pa.
Giklaro ni Moti nga ang maong serbisyo mapahimuslan gihapon niadtong mga miyembro nga duna nay karaan nga loyalty card apan ang Loyalty Card-Plus mas gipahugtan ang features niini.
Giawhag ni Moti ang tanang miyembro sa Pag-IBIG Fund nga wala pay cash card sa pagkuha og loyalty card aron makapahimulos sa mga benepisyo niini.
Kadtong buot nga mo-avail sa Loyalty Card Plus kinahanglan magdala og valid IDs ug dunay i-fill out nga form ug bayad nga P125. (GMR) (BANATNEWS)
- Latest
