Magtiayong Chiong nagpasalamat kang Duterte

CEBU, Philippines — Nakigkita ang magtiayong Dionesio ug Thelma Chiong kang Presidente Rodrigo Duterte atol sa pagbisita niini sa Dakbayan sa Naga kagahapon.

Kini aron personal nga nagpasalamat sa kamanduan niini sa pagsikop pagbalik sa tulo gikan sa pito ka akusado nga nikidnap ug nipatay sa iyang mga anak nga sila si Maryjoy ug Jaqueline Chiong niadtong tuig 1997.

Sa mensahe nga gipadala ni Thelma sa Banat News kini nitug-an nga tuyo niyang niadto sa Dakbayan sa Naga aron kung mahatagan siya og kahigayonan nga makahimamat ang Presidente iyang ipaabot ang personal niyang pasalamat.

Sumala pa ni Chiong nga ang kamanduan sa Presidente nakapahupay sa ilang gibati nga kaguol tungod kay usa kini ka maayong lakang.

Mapasalamaton ang magtiayong Chiong human nagkahinabi sila ni Police Regional Office 7 Regional Director Police Brigadier General Debold Sinas kinsa ipasalig sa ilang kaluwasan ug ang pagsikop usab sa tulo ka akusado. (Rowena D. Capistrano/GMR)

Taytayan habig sa Lapu-Lapu gibantayan na og polis

Higpit karon nga gibantayan sa kapolisan sulod sa 24-oras ang duha ka taytayan nga nagdugtong sa Dakbayan sa Lapu-Lapu ug Dakbayan sa Mandaue.

Kini aron pagpakgang niadtong mga tawo nga nagtinguha sa pagpakamatay pinaagi sa paglayat niini.

Si Police Colonel Clarito Baja nga maoy direktor sa Lapu-Lapu City Police Office ang nidestino og iyang mga sakop sa habig sa Barangay Pusok sa Marcelo Fernan Bridge ug habig sa Barangay Pajo sa Mactan-Mandaue Bridge.

Giluwatan ang maong kamanduan ni Baja isip pagsanong sa kamanduan ni Mayor Junard “Ahong” Chan nga magdestino og mga polis sa nahisgutang taytayan.

Si Chan niingon nga ang pagdestino og mga polis sa nahisgutang duha ka taytayan mao lang ang lakang nga dinalian tungod sa mga kabalaka nga nahimo na lang kini nga lugar sa mga tawo nga naghambin og bug-at nga mga suliran.

Dugang ni Chan nga ang Mactan-Cebu Bridge Manangement Board ang nagkinahanglan gyud nga mohimo og mga lakang alang sa permanente na gyud nga kasulbaran sa pagpakgang sa mga tawo nga buot maghikog pinaagi sa paglayat sa taytayan.

Sa habig sa Dakbayan sa Mandaue, si Police Colonel Jonathan Abella, director sa Mandaue City Police Office, ang nagdestino na sab og mga polis sa duha ka taytayan ug gani duha na ka higayon nga nakaluwas ang kapolisan og mga tawo nga nagtinguha sa paglayat ug ang labing ulahi mao kadtong 28-anyos nga lalaki nga taga Lungsod sa Cordova. (/GMR)(BANATNEWS)