Chiong nalipay sa kamanduan sa Presidente
CEBU, Philippines – Gikalipay sa magtiayong Dionesio ug Thelma Chiong ang kamanduan ni Presidente Rodrigo Duterte nga dakpon pagbalik ang tulo ka akusado sa kasong pagdagit ug pagpatay sa ilang duha ka anak nga babaye.
Ang magtiayong Chiong maoy ginikanan sa magsuong Mary Joy ug Jacqueline kinsa brutal nga gikidnap ug gipatay niadtong 1997.
Ang tulo sa pito ka akusado mao sila si Josman Aznar, Albert Caño ug Ariel Balansag kinsa gibuhian sa Bureau of Corrections tungod sa Good Conduct Time Allowance (GCTA) System. Apan si Thelma may kabalaka tungod kay gihatagan pa kini og 15 ka adlaw diin taas ra kaayo ug mahimo pa nga makasibat ang mga akusado.
Matud sa inahan nga ang kamanduan sa Presidente tubag sa iyang pag-ampo nga unta mabalik na ang tanang nabuhian sa BuCor ilabi na kadtong nakahimo og mga linuog nga krimen. Awhag ni Chiong ngadto nila ni Aznar, Caño ug Balansag nga boluntaryo nalang nga modangop sa kapolisan ug dili nalang paaboton nga sila matukhang. Nanghinaut si Chiong nga ang boluntaryong pagdangop sa tulo ngadto sa kapolisan maoy regalo sa adlaw nga natawhan sa ilang anak karong Septiyembre 8 ug 9.
Walay nakitang problema si Thelma sa GCTA System sanglit adunay mga piniriso nga nagbag-o na sa ilang kinabuhi apan kadtong mga nihimo sa linuog nga binuhatan angay lang gyud sila mapriso ug bayran ang ilang nahimo nga salaud.
Nanawagan ang magtiayong Chiong sa komunidad nga tabangan sila ug ang kapolisan ilabi na sa mga nakaila sa tulo ka akusado nga nakagawas na sa pagtuo nga nausab na ang ilang panagway human sa 22 ka tuig. Kagahapon tuyo nga nibisita sa buhatan sa Criminal Investigation and Detection Group nga maoy responsable sa pagkasikop sa pito ka akusado. Samtang ang director sa Cebu City Police Office, Police Col. Gemma Cruz-Vinluan, nibutyag nga base sa ilang monitoring nga tua pa sa kaulohan ang tulo ka akusado. Awhag ni Vinluan sa tulo nga motahan nalang sa BuCor ug makig-alayon sila kung limpyo ang ilang kaugalingon sa ilang kagawasan. (/GMR)(BANAT NEWS)
- Latest
