Nag-make up, nag- ‘ML’ atol sa trabaho
CEBU, Philippines – Naghimo og imbestigasyon ang Cebu City Legal Office ug Human Resource Development Office sa mga giingong empleyado nga nasakpan sa mga sakop sa Civil Service Commission nga nag-makeup session ug duna say mga nagduwa og mobile legend sa oras sa opisina.
Si City Attorney Rey Gealon nagkanayon nga ang siyudad mopahamtang og angay nga mga aksyon kun mapamatud-an nga ang mga tawo nga nakit-an kun tinuod nga empleyado sa City Hall.
“Considering that we are yet on transition stage, most if not all the people in and around the premises of the City Hall building, especially those along corridors, were either applying for government positions or awaiting employment or appointments for courtesy calls,” sigon niya.
Niadtong miaging Martes, gipangunahan ni CSC Commissioner Aileen Lourdes Lizada ang surpresa nga pagbisita sa City Hall diin nakita niya ang mga giingong trabahante sa siyudad nga nagdula og mobile games ug aduna say mga sesyon sa pag-makeup.
Kini ilang gibuhat samtang adunay mga tawong naghulat aron maserbisyohan o dunay tuyo diha sa city hall.
Gipasabot ni Gealon nga ang mga tawo nga nakuhaan og hulagway ug video ipatawag aron maka-esplikar sa ilang bahin atubangan sa investigating body. Ug kun sila makumpirmar nga mga empleyado sa siyudad hayan ipaubos sila sa imbestigasyon.
Ang HRDO gikatakdang mag-isyu og usa ka memorandum sa tanang mga departamento ug opisina sa City Hall nga nagmando sa mga department heads nga ang tanang empleyado pahimangnoan sa posibleng mga silot nga atubangon kung sila magmika lang sa oras sa tingtrabaho. Kagahapon, nanawagan si Mayor Edgardo Labella alang sa usa ka panagtagbo sa mga department heads aron makahibaw sila sa obserbasyon sa CSC sa wala pa siya mobiya sa iyang opisyal nga pagbiyahe sa China.
Gimandoan ni Labella si City Administrator Floro Casas, Jr. nga ang mga tawo nga wala’y transaksyon sa sulod sa City Hall ug kadtong mga aplikante nga dili maglakaw-lakaw diha sa sud sa city hall aron dili sila makasamok o makadisturbo sa ubang mga kliyente sa syudad. (/IBM)(BANAT NEWS)
- Latest
