Mayor sa naga suspendido na

CEBU, Philippines – Hingpit na nga na-served sa Department of Interior and Local Government ang preventive suspension order batok kang Naga City Mayor Valdemar Chiong.  Subay kini sa kamanduan sa Sandiganbayan nga ipaubos sa 90 ka adlaw nga preventive suspension ang mayor may labot sa graft case sa giingong pag-isyu niya og permit sa dili kwalipikado nga kompaniya niadtong 2014.

Matud ni DILG Provincial Director Jerome Gonzalez nga iyang na-served pasado alas 2 sa hapon niadtong Septiyembre 2 ang suspension order sa panimalay ni Chiong sanglit on leave kini ug personal kini nga gidawat sa mayor.

Nunot niini awtomatik nga ang iyang anak nga si Bise Mayor Christina Vanessa Chiong ang molingkod isip acting mayor.

Apan ang numero unong konsehal kinahanglan pa kini magsuwat sa Secretary sa DILG.

“Dili siya automatic, ang vice mayor automatic siya nga acting mayor unya ang first councilor mag-report siya didto og temporary vacancy, and it has to be designated by the President through the Secretary of Interior of the Local Government,” matud ni Gonzales.

Human madawat sa Secretary sa DILG, moisyu og designation ngadto sa konsehal isip acting vice mayor. (/GMR)(BANAT NEWS)