P3.6 bilyon gitugyan na sa korte ngadto sa siyudad
CEBU, Philippines – Nakadawat ang kagamhanan sa Dakbayan sa Sugbo og P3.6 bilyones human gi-grant sa korte ang motion to withdraw sa consigned nga kantidad gikan sa consortium nga nagpalit sa 26.3 ektaryang luna sa South Road Properties.
Kagahapon gibutyag ni City Legal Officer Rey Gealon nga ang iyang opisina nakadawat sa mando gikan sa Regional Trial Court Branch 12 nga nagmando sa pagpagawas sa mga pondo nga gi-consigned sa SM Prime Holdings, Inc.; Ayala Land, Inc., ug Cebu Holdings, Inc.
“This is a victory for the City of Cebu. Imagine the programs and projects that would be comprehensively implemented out of this almost P4 billion for the good people of Cebu,” sigun niya.
Ang kinatibuk-ang consigned nga kantidad nga P3,636,603,333.34 nagrepresentar sa ikaduha, ikatulo ug katapusang pagbayad sa consortium sa SM-Ayala-Cebu Holdings, Inc. nga nagpalit sa 26.3 ektaryang luna sa SRP.
Niadtong 2015, gipalit sa mga higanteng kompanya ang maong luna sa kantidad nga P10.009 bilyones.
Kahinumduman nga wala gidawat ni kanhi mayor Tomas Osmeña ang maong bayad sa luna maong gi-consigned sa mga kompanya ang maong kantidad sa korte.
Si Osmeña nagtuo nga dili balido ang kontrata sa siyudad ug sa mga kompanya nga nakapalit sa maong luna.
Sa iyang Agosto 30 nga kamanduan, gi-grant ni Presiding Judge Estela Alma Singco ang pagpagawas sa kantidad ngadto sa Office of the City Treasurer. (/GMR)(BANAT NEWS)
- Latest
