P300 milyon gigahin alang sa karsada ug relocation site

CEBU, Philippines — Ang kagamhanan sa Dakbayan sa Sugbo nigahin og P300 milyones nga pundo alang sa pag-abli og kadalanan, pagpalit og luna ug pag-ugmad sa mga relocation site sa dili pa matapos niining tuiga.

Si Atty. Jose Daluz, III, special assistant to the mayor nibutyag nga ang executive department nisugyot sa P150 milyones alang sa road opening, P100 milyones alang sa site development ug P57 milyones alang sa lot acquisition ubos sa giduso nga P2.5 bilyones nga Supplemental Budget-2.

Gipasabot ni Daluz nga ang pag-abli og mga karsada diha sa bukirang lugar sa siyudad magkonektar kini diha sa lowland areas.

Gilakbit ni Daluz ang kabahin sa proyekto sa national government nga mao ang Cebu Expressway diin magtukod og karsada gikan sa Dakbayan sa Naga hangtud sa Dakbayan sa Danao. Gibutyag ni Daluz nga adunay mga relocation site ang siydud nga kinahanglan pang ugmaron diin lakip niini ang 93-1lot diha sa Barangay Busay nga adunay 5,000-square meters nga gilapdon.

Ang executive department, pinaagi sa Division for the Welfare of the Urban Poor (DWUP) ang mangulo pag-ugmad sa mga relocation site.

Lakip nga ugmaron ang relocation site diha sa Barangay Quiot ug uban pang mga barangay.

Dugang ni Daluz nga ang siyudad mopalit og luna diha sa Barangay Inayawan alang sa lainlaing mga proyekto sa administrasyon. (/BDB)(BANATNEWS)