Sunod Pasigarbo sayuhon
CEBU, Philippines — Giangkon sa lead organizer sa Pasigarbo sa Sugbo nga si Victor Cuenco nga alkansi ang mga nauwahi nga contingents kay naghuwat og mas dugay aron maka-perform sa Cebu City Sports Center.
Nasayran nga 44 ka contingents ang niapil sa Pasigarbo sa Sugbo 2019 diin nilungtad og 13 ka oras ang kalihukan nga nagsugod og alas 2 sa hapon sa Cebu Provincial Capitol ug nahuman sa ritual showdown sa CCSC pasado na ala 1 sa kaadlawon kagahapon.
Matud ni Cuenco nga sa sunod mangita sila og paagi nga masayo-sayo paghuman ang performance sa mga contingents.
“Maybe in the future we can have north and south categories and then grand finals or we will start the street dancing in the morning so at 1 p.m. we can start with the ritual showdown,” matud ni Cuenco.
Niadtong Domingo nabantayan nga taas ang gap sa mga contingents sa street dancing diin alas 7 na sa gabii kini nahuman ug dayon gisundan sa ritual showdown.
Taliwala niini gihulagway ni Cuenco ang Pasigarbo sa Sugbo 2019 nga, “one of the most highly level up, grand, and competitive” pag-abot sa production value.
Atol sa repeat performance ug awarding sa mga nakadaug, si Gobernador Gwendolyn Garcia nagpasalamat ug nalipay sa partisipasyon sa mga contingents bisan sa usa lang ka buwan nga preparasyon niini.
Matud ni Garcia nga sa performance sa mga contingents nagpamatuod lang nga kaya sa mga Sugboanon mopakita og world class nga performance nga angay ipasigarbo. (GMR) (BANATNEWS)
- Latest
