Gibinaklid nga patay’ng lawas nailhan na

CEBU, Philippines —  Lalaking nakaplagang patay nga gibinaklid paggapos didto sa Cordova sa miaging semana nailhan na sa kapolisan.

Kahinumduman nga niadtong Agosto 23 sa alas siyete sa buntag, nakaplagan ang patay’ng lawas sa usa ka lalaki nga naglutaw-lutaw sa dagat didto sa Shell Island, Cordova.

Gibinaklid kini sa paggapos ginamit ang usa ka nylon ug anaa kini samad pinusilan sa iyang liog nga maoy gituohang hinungdan sa kamatayon niini.

Nagsul-ob kini og pink nga t-shirt ug green nga surfing shorts. Sumala pa sa imbestigador sa maong kaso nga si Police Master Sergeant Marvin Ando, niadtong Domingo sa gabii positibong  giila sa mga kabanay ang patay nga kini si Raymond Montemayor Rama, 32, taga Barangay Inayawan, Dakbayan sa Sugbo. Giingong niadtong Agosto 21 sa gabii pa katapusang nakit-an sa inahan ang biktima apan wala masayri kun kinsay kuyog niini.

Gidudahang sa laing dapit gipatay ang biktima ug gitambog kini sa maong dapit. Wala pay matumbok ang kapolisan kun kinsa ang mga mamumuno. (Camille Pateres/IBM)

Gisaka sa balay gipatay

Usa ka 22- anyos nga gipasanginlang tulisan ug tigpayuhot sab og shabu ang gisaka sud sa iyang balay gipusil patay samtang natulog sa ilang balay didto sa Sitio Humayan, Barangay Pangdan, Dakbayan sa Naga kagahapon sa kaadlawon.

Ang maong nakalas giila sa kapolisan nga si Julius Ceasar Aliganga, residente sa dapit. Base sa inisyal nga imbestigasyon sa kapolisan giguba sa mga mamumuno ang pultahan sa balay ug gipusil ang biktima hinungdan sa iyang hinanaling kamatayon.

Ang hepe sa Naga City Police Station nga si Police Major Jason Villamater nagkanayon nga personal ug pagkalambigit sa mga pagpanulis ug ang kalambigitan sa negosyo sa illegal nga drugas ang gitan-aw nilang motibo sa krimen. Giingong notado nga tulisan ug tigpayuhot og drugas sa Dakbayan sa Talisay ug Dakbayan sa Sugbo ang biktima. Matud pa nga posibleng gikontrahan kini sa mga kaubang kriminal. (IBM) (BANATNEWS)