Kawani sa City Hall sikop sa buy-bust

CEBU, Philippines — Usa ka empleyado sa Dumaguete City Hall ug duha ka mga kauban ang nasikop sa buy-bust operation sa South Road, Calindagan, Dumaguete City, Negros Oriental niadtong Sabado sa gabii.

Samtang lalaki nga dinakpan sa buy-bust operation natumbok nga nangawat sab diay sa usa ka dakung farm sa Dakbayan sa Danao.

Nasikop sa mga operatiba sa Philippine Drug Enforcement Agency 7 ang empleyado sa lokal nga kagamhanan sa Dumaguete City kinsa giila nga si Apolinario Belen alyas Buyog.

Ang duha ka kaubanan niini gilla nga sila si Froilan Gerumo alyas Titong ug si Cecille Cuete.

Nasakmit gikan sa tulo ang walo ka pakete sa gituohang shabu diin motimbang na og 10 ka gramo nga mobalor og P68 mil.

Nasakmit sab ang pipila ka drug paraphernalia ug upat ka cellphone sa mga suspek.

Sa laing bahin, niadtong Huwebes nasikop sa buy-bust operation ang giila sa kapolisan nga si Marvin Batoon.

Lakip nga nadakpan ang igsuon niini kinsa gikatahong kakunsabo nga si Jessie Batoon.

Sila nakuhaan og usa ka medium ug 11 kabuok gagmay nga pakete sa gituohang shabu nga mobalor na ngadto sa P36 mil.

Sa dihang nadakpan sa kapolisan, nipatim-aw ang representante sa daku nga farm sa Barangay Santican, Dakbayan sa Danao ug nitumbok sa duha ka dinakpan nga mao sab ang nangawat sa ilang farm niadtong Agosto 19.

Dihang gironda nila ang panimalay sa managsuon, napalgan ang gikawat nga mga battery ug usa ka submersible pump.

Ang hepe sa kapolisan sa Dakbayan sa Danao nga si Police Lieutenant Colonel Maribel Getigan nagkanayon nga nailhan ang duha sa guwardiya sa maong farm.

“Identified gyud sila sa guwardiya, nakakita man ang guwardiya nila pero atong time-a wala siya makasukol kay wala pa siya’y armas,” si Getigan nagkanayon.

Butyag sa maong hepe nga notadong kawatan na ang managsuon sa maong lugar.

Kasong pagpamaligya ug paghupot og ilegal nga drugas ang kasong atubangon sa duha samtang niining pagsuwat kasamtangan pa nga gipaabot sa kapolisan ang representante sa maong farm aron mopasaka og kasong robbery batok sa duha. (/GMR)(BANATNEWS)