Kawani sa Mandaue City duha naka buwang wa pay sweldo
CEBU, Philippines — Wala pay sweldo nga nadawat ang mga kawani sa Mandaue City Hall sulod sa dul-an na duha ka buwan sukad nilingkod ang bag-ong adminitrasyon.
Kini ang nakapaaghat sa konseho sa siyudad pinaagi sa resolusyon nga giduso ni Konsehal Joel Seno sa pag-awhag sa hingtungdang mga buhatan nga paspasan ang paghimo sa payrollug pagpagawas sa sweldo.
Ipatawag sab sa konseho ang Releasing Officer, Human Resource Management Office staff nga responseble sa pagdawat sa mga daily time records, City Budget Officer, Auditor sa City Accounting Office, City Accountant, City Treasurer’s Office, City Administrator ug pangulo sa Quality Management System alang sa usa ka tigum.
Kini aron pagtuki sa mga pamaagi nga masulbad ang kalangan sa sweldo sa mosunod pa nga mga buwan.
Matud ni Seno nga lisud ang kahimtang sa mga kawani sanglit ang sweldo maoy gisaligan sa inadlaw-adlaw nga gasto.
Si Seno maoy chairman sa committee on appropriation, budget and finance; laws and ordinances; good governance, ug ethics.
Gipasabot ni Seno nga ang kalangan sa sweldo maoy magtukmod sa mga kawani sa pagpangutang hinungdan ug matag sweldo igo nalang ibayad sa ilang utang.
“This seeks to curb further this injustice of late payment of wages or salaries without any justifiable reason,” dugang ni Seno. (/IBM)(BANATNEWS)
- Latest
