PRO-7 di gyud modawat og kwarta sa karera
CEBU, Philippines – Hugot ang basuragan sa Police Regional Office 7 batok sa pagdawat og kwarta gikan sa ilegal nga sugal.
Tubag kini sa pamahayag ni Presidente Rodrigo Duterte nga mahimo ra silang makakwarta sa video karera.
Sa report sa Philstar.com, namahayag ang Presidente atol sa ika-118 Police Service Anniversary sa Kampo Crame nga wala siyay pakialam nga makakwarta ang polis gikan sa video karera sanglit nakasabot siya nga nagkalisud gihapon sa pagbuhi ang polis sa pamilya niini.
Apan ang direktor sa PRO-7 nga si Police Brigadier General Debold Sinas nagkanayon nga pangsikopon ug pang-imbarguhon gihapon nila ang mga video karera sa rehiyon.
“Absolute gihapon ang no video karera sa Cebu,” sigun sa heneral.
Padayag niini nga lig-on ang ilang baruganan nga wala sila mangwarta gikan sa mga video karera.
Iyang gitataw nga mao kini ang tapokanan sa ilegal nga mga binuhatan sa mga batan-on.
“We have already proved, diha magtambay ang mga out of school youth, anha mag-distribute og shabu,” matud ni Sinas.
Mando ni Sinas sa iyang mga polis nga hutdon sa pagdakop ang tanang matang sa ilegal nga sugal diin lakip na ang video karera. (/GMR) (BANAT NEWS)
- Latest
