Inasal mapalit na diha sa Talisay City Hall ground

CEBU, Philippines — Ang mga mahiligon og lechon baboy matag adlaw nga Domingo makapalit na kini diha sa ground sa Talisay City Hall.

Kini maoy gipahibawo ni Mayor Gerald Anthony “Samsam” Gullas, Jr. human nila nakita nga nagmalampuson ang unang adlaw nila nga pagbukas niadtong niaging Domingo.

Gibana-banang kapin sa 300 ka tawo ang nangaon og inasal samtang nanuroy diha sa lugar.

Matud ni Gullas nga magamit gyud ang lugar nga pang pamilya tungod kay aduna may dakong hawan nga kaduwaan ang kabataan, maka jogging ug uban pa nga pagahimuong bonding diha sa lugar.

Ug kong gutomon ang pamilya sa ilang pagsuroy-suory o sa ilang gihimong mga kalihukan mahimo dayon sila nga mangaon sa lamian nga lechon nga gibaligya diha sa lugar.

Apan duha pa lang ka mang-lechon-nay ang gihatagan nila og kahigayonan sa pagbaligya diha sa plaza sa city hall samtang gipaanad pa ang katawhan sa ilang produkto.

Giklaro ni Gullas nga sa Septiyembre 1, 2019 himuon nila ang grand opening alang sa tanan.

Gipasabot ni Gullas nga dili kini mahimong kompetensiya sa uban kay ang makatinda sa pagkakaron pulos man usab mamaligyaay diha sa Barangay Poblacion.

Magsugod ang pagbaligya sa lechon sa alas 5:00 sa buntag hangtud na sa alas 12:00 sa udto. (BDB) (BANAT NEWS)