Panagang batok lamok ipasuot sa mga tinun-an

CEBU, Philippines — Giawhag sa Provincial Board ang Department of Education 7 nga tugtan ang mga tinun-an nga makasul-ob og panagang batok sa lamok.

Kini sama sa long sleeves, long pants sama sa pajama o dili ba kaha malong o bisan unsa nga senina aron maprotektahan ang lawas paglikay nga mapaakan og lamok nga nagdala og dengue.

Atol sa regular session sa PB kagahapon gipasar ang resolusyon ni Bokal John Ismael Borgonia alang sa maong awhag ngadto sa DepEd.

“Additional preventive methods should be adopted such as wearing of protective clothing or garments in schools and in other public places should be campaigned and implemented both by the LGU and DepEd,” matud sa resolusyon ni Borgonia.

Matud ni Borgonia nga alang kini sa tanang pangpublikong tunghaan sa elementary ug high school sa tibuok Lalawigan sa Sugbo.

Ang Department of Health una nang nideklarar og dengue epidemic tungod sa ubay-ubay nga kaso sa dengue sa pipila ka probinsiya ug rehiyon sa nasud.

Gani duha ka hugna sa pagsaka sa dengue sa Central Visayas ang gipaabot sa DOH-7 karong tuiga. Kini ang gitug-an ni Dr. Ronald Jarvik Buscato, dengue program coordinator sa DOH-7, nga nahinabi sa mga tigbalita.

Matud ni Buscato nga gipaabot ang pagsaka sa kaso sa dengue sa Septiyembre ug ang ikaduha ngadto na sa buwan sa Nobiyembre.

Kini kung sa higayon nga dili mapugngan sa ilang mga gihimo nga pagpangandam sama sa search and destroy breeding places; seek early consultation; self protection measure; ug support spraying to prevent impending outbreak.

Sumala pa ni Buscato nga anaa na hinoon sa ikaunom ang Rehiyon 7 sa adunay daghang kaso sa dengue ikomparar sa nilabay nga tuig 2016 nga naglawig kini sa nag-unang daghang kaso.

Gitug-an ni Buscato nga sa Rehiyon 7 maayo ang pagkontrolar sa Sugbo may kalabutan sa sakit nga dengue kung ikomparar sa Bohol ug Negros Oriental apan giawhag niya ang katawhan nga dili gihapon mokompiyansa ug padayon gihapon sa pagpanglimpyo.

Gitug-an ni Buscato nga base sa labing ulahing talaan sa Regional Epidemiology and Surveillance Unit, adunay 11,865 ka kaso sa Central Visayas gikan sa Enero hangtud Agosto 8, 2019 diin mas taas kini og 124 porsyento sa nilabay nga tuig sa susamang mga buwan. Si Buscato nitug-an nga kung tinguha man gyud ni Presidente Rodrigo Duterte nga ibalik ang Dengvaxia vaccine, daku kini og hagit ilabi na kinahanglan pa usab kini susihon ang tanang mga dokumento aron sa pagseguro.

Gihimug-atan ni Buscato nga kung ibalik ang Dengvaxia kinahanglan na usab mobalik sa sinugdanan tungod kay nilapas naman ang unang hugna niini.

Giklaro usab ni Buscato nga wala pay resulta sa pagtuon nga ang ahos usa ka anti-dengue ug segurohon lang ang gigamit niini nga gibutangan og tubig nga dili maitlogan og lamok nga mao na hinoon ang hinungdan sa sakit nga dengue. (Rowena D. Capistrano/GMR)(BANATNEWS)