Drug suspect, suspek sab sa pagtulis ug pagpatay

CEBU, Philippines — Lalaking nadakpan sa buy bust operation sa kapolisan nahibaw-ang suspek sa pagtulis ug pagpatay sa call center agent diha sa IT Park sa Barangay Apas niadtong miaging tuig.

Nadakpan sa Labangon Police Station ang suspek nga si Khalid Alcordo Yuson, residente sa Barangay Mohon 1, Barangay Tisa niining Dakbayan sa Sugbo atol sa buy bust operation niadtong Lunes. Matud pa ni Police Major Henrix Bancoleta nga nadiskobrehan nila nga aduna kini pending nga warrant of arrest sa kasong robbery with homicide.

Gikompirmar sa chief investigator sa Mabolo Police Station nga si Police  Chief Master Sergeant Antonio Din nga si Yuson ang suspek sa pagtulis ug pagpusil patay sa 37-anyos nga call center agent nga si Lorraine Temple.

Butyag ni Din sa Banat News nga atol sa pagpalawom sa ilang imbestigasyon, nahinabi nila ang usa ka habal-habal drayber sa IT Park ang maoy nakasaksi sa krimen ug nakamay-ong sa suspek.

Giluwatan ni Presiding Judge Cesar P. Bordalba , sa Regional Trial Court Branch 16, Cebu City, ang warrant of arrest ni Yuson sa kasong Robbery with Homicide.

Si Temple naglakaw ra sa dalan Pope John Paul Avenue, corner Guibilundo Street, Barangay Mabolo niadtong Oktubre 3, 2018 sa alas dos sa kaadlawon aron moadto sa sakayanan sa jeep padung sa Lapu-Lapu City apan gilabnihan kini. Dihang nagdumili kini paghatag sa bag gipusil kini sa tulisan.

Gisusi sab karon kun si Yuson mao ang kauban sa pagpanulis ug pagpatay sa 21 anyos nga tinun-ang lalaki sa kolehiyo nga si Jovanie Pat niadtong Marso 22 ning tuiga diha sa dalan Tres de Abril, Barangay Labangon.  Ang usa sa mga suspek kinsa gitumbok nga maoy mipusil sa biktima nailhan na sa kapolisan nga si Rizford Luarez. (/IBM)(BANATNEWS)