Zubiri nihatag og hinabang sa mga namatay sa trahediya

CEBU, Philippines — Si Senador Migz Zuburi nitunol og hinabang pinansiyal ngadto sa siyam ka mga residente sa Barangay Ermita kinsa nangamatay human ang ilang gisakyang bangka nalunod ngadto sa Iloilo-Guimaras Strait.

Ang mga namatay mao sila si Jared Janson, Danilyn Baguio, Rommel Baguio, Dannelle Baguio, Romeo Baguio, Sr., Angelina Baguio, Bernando Janson, Romero Baguio, Jr. ug Jay Arvien Baguio.

Matag usa sa maong mga namatay gihatagan og P5,000 nga pinansiya nga hinabang diin gitunol kini ngadto sa ilang mga pamilya.

Si Ernest Herrera kinsa konektado sa buhatan ni Zubiri sulod na sa 11 ka tuig sa wala pa kini modagan isip konsehal sa Dakbayan sa Sugbo sa nilabay’ng eleksiyon ang nitunol sa maong pinansiyal nga hinabang gikan sa senador.

Giingong si Herrer gitawagan ni Zubiri sa niaging adlaw ug namalihog sa pagtunol sa hinabang ngadto sa mga biktima.

Si Romhel Baguio nga anak ni Romeo Sr. ug Angelina ingon man si Jason Janson nga anak ni Bernardo dako ang pasalamat sa tabang nga ilang nadawat.

Subay niini, si Ermita Barangay Captain Mark Miral miasoy una nilang nasabutan sa pamilyang Baguio ug Janson ang buhaton sa hinabang nga ilang madawat mao nga mangita og yuta sa sam-ang ug buhatan og mausoleum ang pito nga nakalas ug ang sobra niini ilang bahinon.

Giklaro ni Miral nga adunay sestema nga buhaton sa pagbahinay sa hinabang nga nadawat sa pamilyang Baguio ug Janson. (/BDB)(BANATNEWS)