Nahasol apan nalingaw sa Iron Man Triathlon

CEBU, Philippines — Nagbaklay  sa dalan  nga nagdala sa ilang mga butang sa ilang pagbiyahe  ang mga lokal  ug langyaw nga mga dumoduong  paingon sa lugar nga nahimutangan sa nagsugat unta nila nga sakyanan sa ilang paghidangat  sa Mactan Cebu International Airport (MCIA) gikan sa Manila.

Si  Carlito  Samonte,  47  anyos nga taga  Tayud, Consolacion nga nagsugat sa magtiayon niyang agalon nga may kuyog nga tulo ka mga langyaw nga bisita nga taga San Jose, California miingon nga mosamot ilang kalangan kun molahos pa sa MCIA iyang gimaneho nga sakyanan.

Matud pa niya nga gituyo sa iyang agalon nga maglakaw ug anha nalang magabot sa  usa ka mall aron sab makahapithapit sab og tan-aw sa ilang bisita sa gipahigayong Ironman 73.0 Philippines.

Apan bisan og nagkita na sila sa iyang agalon gipili nalang nilang magpaabot hangtud mahuman ang lumba tungod kay di man sab sila makalahos agi sa M.L. Quezon kay gisirad-an man tungod sa maong kalihokan.

Sa traffic  advisory  sayo pa sa kaadlawon pangsirad-an ang mga dalan  sa Dakbayan  sa Lapu-Lapu  paingon ngadto sa Dakbayan sa Talisay tungod sa tinuig nga Ironman 73.0  Philippines.

Apan bisan pa sa pasidaan daghan gihapong nangatanggong sa mga dalan, apan nakapanindot gihapon kini sa talan-awon tungod kay kadtong wala magdali nalingaw nalang sab og lakaw padung sa ilang destinasyon samtang nagtan-aw sa mga atleta nga dunay daghang mga artistang nangapil.

Si Lorlie Norida, 28  anyos,  dalaga nga taga  Tayud, Consolacion kuyog sa iyang mga kauban sa trabaho nga call center agent   maoy usa sa nagpaabot sa ubos nga bahin sa Marcelo Fernan Bridge sa Barangay Pusok, Dakbayan sa Lapu-Lapu.

Matud pa niya ilang gipaabot ang paglabay sa aktor nga si Piolo  Pascual nga matud pa niya usa sa miapil sa Ironman 70.3  2018  apan wala siya makakita sa personal niadtong higayona tungod nasalipdan man ilang nahimutangan.

Ang kapolisan nagkanayon nga wala silay natalang krimen nga nakaapektar sa maong lumba kagahapong adlawa.

Ang direktor sa Lapu-lapu City Police Office nga si Police Colonel Carlito Baja nagkanayon nga hapsay ug malinawon ang maong event kagahapon.

Ang direktor sab sa Mandaue City Police Office nga si Police Colonel Jonathan Abella nagkanayon nga atol sab sa maong event, walay natala nga krimen sa lugar diin sab kini gipahigayon. (Romeo Limpangog ug Camille Pateres/IBM)

Priso naghikog

Patay ang usa ka 22anyos nga priso sa Dalaguete Police Station human kini nagkutlo sa iyang kinabuhi sulod sa pansayan sa maong prisohan Domingo sa kaadlawon.

Ang nagkutlo sa iyang kinabuhi mao si George Belda Jr., taga Barangay Balud, Dalaguete kinsa nagatubang og kaso may kalabotan sa pagpamaligya og illegal nga drugas. Sumala pa ni Police Corporal Gerzon Alcantara, Desk officer sa Dalaguete Police Station, base sa initial nga imbestigasyon sa wala pa nagkutlo sa iyang kinabuhi nabantayan kini sa mga kaubang priso nga nagpitok-pitok ra ang mata ug dili motingog hangtud nga sila nangatulog na.

Sa dihang mangihi na ang usa sa mga priso sa pansayan didto nakit-an si Belda nga nagbitay na ug may higot sa liog niini.Dali kini nadala sa tambalanan apan gideklarar kini nga patay na.

Ang maong prisohan sa Dalaguete adunay walo ka detainees atol sa pagkahitabo. Gisusi pa kun may foul play sa kamatayon ni Belda. (/IBM)(BANATNEWS)