P800M gigahin sa Kapitolyo pag-ayo sa mga karsada

CEBU, Philippines — Gikatakdang sugdan sa Probinsiya sa Sugbo ang pag-ayo sa mga guba nga karsada diha sa mga kalungsuran.

Ubos sa supplemental budget sa probinsiya nga P1,285,156,900 ang P800 milyones niini ang gigahin alang sa pag-ayo sa mga dalan ug tulay o ang maong proyekto ang gigahinan og labing dakong budget.

"We need that supplemental budget to be passed as soon as possible because urgent kaayo ang needs”, padayag ni Gobernador Gwendolyn Garcia. Nunot niini, si Garcia nibutyag nga prayoridad sa kagamhanan sa probinsiya ang provincial roads nga naa sa “poor to fair” ang mga estado niini. Ang provincial engineering nakagama na kini og inventory sa mga dalan nga kinahanglang ayohon.

Matud ni Garcia nga 70 porsyento ngadto sa 80 porsyento sa mga munisipyo sa probinsiya ang malakip sa maong proyekto.

Gibutyag usab ni Garcia nga ang probinsiya nagplano sa pag-standardize sa tanang provincial roads diin ang gilapdon lima ka metros ug walo ka pulgada ang gibag-on sa mga dalan nga dili kaayo makasinati huot nga trapiko ug siyam ngadto sa 10 ka pulgada ang gibag-on alang sa  mga dalan nga agianan ug grabe ang dagan sa trapiko.

Lakip ang mga barangay roads gikatakdang himuong upat ka metros ang gilapdon ug unom ka pulgada ang gibag-on.

Dugang ni Garcia nga paningkamutan sa probinsiya nga sugdan ang pag-ayo og duha ka kilometro sa karsada sa matag munisipyo ug siyudad sa probinsiya karong tuiga. (/BDB)(BANATNEWS)