Livelihood project sa BFAR sa segundo distrito

CEBU, Philippines – Nipirma og kasabutan ang Bureau of Fisheries and Aquatic Resources 7 tali sa Cebu’s Second Congressional District alang sa livelihood assistance ug training sa mga mananagat sa habagatang bahin sa lalawigan.

Si BFAR-7 Director Alfeo Piliton ug Kongresista Wilfredo Caminero nipirma sa Memorandum of Agreement sa farmhouse sa kongresista sa Lungsod sa Alcoy alang sa implementasyon sa proyekto sa ahensiya sa mga lungsod sa ikaduhang distrito. Moabot sa kapin P500 mil nga fishing materials ug supplies ang gikatakda nga ihatag sa mga mananagat gikan sa Lungsod sa Argao, Dalaguete, Alcoy, Boljoon, Oslob, Samboan ug Santander.

Matud ni Piloton nga ang ahensiya niila sa pangihanglanon sa pag-promote sa food security pinaagi sa pagpalambo sa fish production pinaagi sa fisheries technology ug training sa mga mananagat isip direct participants sa proper management sa marine resources.

“In support to the National Fisheries Program of the government, BFAR Region 7 has assessed and identified the need to provide training and livelihood assistance to fisherfolks in the Second District of Cebu,” matud ni Piloton.

Ubos sa kasabutan, ang BFAR-7 mohatag sa pito ka lungsod sa fishing materials ug bangka nga nagkantidad og P585,262 aron pagpalambo sa socio-economic conditions sa mga mananagat.

Sa Argao ang BFAR-7 mohatag og duha ka units sa drift gillnet nga nagkantidad og P44,140; sa Dalaguete ang ahensiya mo-disperse unya og 2,700 kilograms sa seaweed seedlings nga nagkantidad og P40,500. Sa Alcoy, mangapod-apod ang BFAR og unom ka units sa set longline nga moabot sa P37,980; mohatag sab ang ahensiya og duha ka units motorized fiberglass boats sa matag lungsod sa Boljoon, Oslob ug Samboan nga ang kantidad P55,037 matag bangka.

Sa Samboan ug Santander manghatag sab ang ahensiya og tulo ka units sa drift gillnet nga nagkantidad og P22,070.

Kahinumduman nga ang maong mga hingtungdang lungsod nangayo og assistance sa BFAR kaniadto aron suportahan ang livelihood sa mga mananagat sa coastal communities sa maong distrito.

Ang BFAR mohatag sab og skills training ug technical services sa construction ug operation sa maong mga proyekto ug ang ahensiya mo-supervise sab sa construction gamit ang girekomendar nga teknolohiya.

Makig-alayon sab ang BFAR sa local government units ug sa Fisheries and Aquatic Resource Management Councils (FARMC) sa pag-ila sa lugar ingon man selection ug organization sa mananagat nga mahimong beneficiaries sa hands-on training.

Aron mas mapalambo pa ang daily income sa mga mananagat, ang BFAR niumol sab og marketing strategies nga makatabang nila aron mabaligya nila ang ilang produkto.

Magpadayon ang BFAR-7 sa pag-monitor sa operation ug status sa mga awarded project pinaagi sa pakig-alayon sa LGUs.

Ang mga mananagat ug ilang organisasyon sa ilang bahin mosumetir sa BFAR-7 ug LGU og monthly status ug annual report sa proyekto.

Kun pananglitan ang beneficiary mapakyas sa pagsustiner sa operation ug maintenance sa proyekto, ang BFAR-7 mahimong mopatuman sa ilang katungod sa pagbawi sa proyekto, pag-terminate sa katungod sa beneficiary pag-operate sa proyekto, pag-transfer sa project sa laing interesadong mananagat sa dapit. (/GMR)(BANAT NEWS)