17-anyos nanigbas sa iyang silingan

CEBU, Philippines — Gisikop sa kapolisan ang 17-anyos human nanigbas sa iyang silingan nga iyang gipasanginlang namato sa Brgy. Captain Claudio, Dakbayan sa Toledo niadtong Sabado sa hapon.

Gipugngan sa Banat News ang pangalan sa suspetsado sanglit menor de edad pa kini.

Samtang ang biktima giila nga si Harry Laput, 18-anyos, residente sa Sitio Maypis sa maong barangay.

Sigon pa sa Toledo City Police Station, gibato ang 17-anyos ug naigo ang wala nga paa niini.

Gipasanginlan niya ang silingang si Laput, apan giingong wala kini moangkon, naglagot og samot ang suspek ug mikuha og bolo ug gitigbas si Laput sa likod.

Dali nga nakadagan palayo si Laput ug nangayo og tabang sa mga otoridad.

Giingong naabtan sa kapolisan ug sa mga tanod sa maong barangay ang maong suspek ug gisikop kini.

Samtang anaa na sa luwas nga kahimtang ang biktima.

Kay menor de edad pa ang suspek,  gibuwag kini og selda sa mga hamtong nga piniriso.

Anaa kini karon sa kustodiya sa Women and Children’s Protection Desk sa maong estasyonan.

Giingong gipaabot pa kini nga maluwatan og certificate of discernment ang suspek.

Matud sa kapolisan nga wala pay record sa ilang estasyonan ang batan-on.

Wala sab kini nadungog nga palaaway sa ilang dapit. (Camille L. Pateres/DILT)

Mandaue CJ dunay bag-ong warden

Nilingkod na ang bag-o warden sa Mandaue City Jail nga si Jail Superintendent Gil Inopia hulip ni Jail Superintendent Jessie Calumpang.

Ang paghulip ni Inopia kang Calumpang gumikan sa kamatayon sa binilanggo nga si Romy Ramas nga gipusil atol nga nagduwa og basketball.

Si Inopia niingon nga nakalitan kaayo siya sa kalit nga pagbalhin kaniya sa Mandaue City Jail nga iyang giisip nga usa ka dakung hagit sanglit bag-o pa nga nahitabo ang pagpamusil patay sa binilanggo nga si Ramas.

Nahimong kontrobersiyal ang kamatayon ni Ramas human nga ang suspek nga nagpusil mao lang sab ang kauban niini nga binilanggo nga nilampos sa pagpalusot sa maong armas sa bilanggoan nga wala makamatikod ang mga jail guard nga nagbantay. 

Hinoon dili na bag-o kang Inopia ang pagdumala sa maong bilanggoan tungod kay kanhi na man usab kini nahimong jail warden sa maong bilanggoan sa tuig 2014 hangtud sa 2016.

Sa gihimo nga turnover ceremony maoy ilang gikasabotan sa Bureau of Jail Management and Penology 7 nga sa sunod pa semana ang ilang hingpit nga pagbiya sa katungdanan isip jail warden niini.

Gawas kang Calumpang, ang 60 ka jail guard personnel sa BJMP nga nadestino sa nahisgutang pasilidad ang lakip sab sa gihulipan sa ilang mga katungdanan.

Si Inopia ang pagahulipan usab isip jail warden sa Medellin District Jail ni Superintendent John Conrad Basilio. (/GMR)(BANATNEWS)