Barko nasangad sa Lauis Ledge

CEBU, Philippines — Usa ka barko ang nasangad diha sa parola nga nahimutang sa Lauis Ledge niadtong Sabado sa buntag, hinuon luwas ra ang 18 ka mga langyaw nga tripulante niini.

Ang maong barko nga MV Arikun usa ka cargo vessel. Matud pa sa tigpamaba sa Philippine Coast Guard Central Viasayas nga si Lt. Junior Grade Michael John Encina, ang maong barko nagkarga og 4, 210 toneladang harina.

Aduna kini 18 ka mga tripulante nga pulos langyaw, ang 13 mga Chinese, tulo ka Vietnamese ug duha ka Burmese ug silang tanan luwas ra human sa insidente.

Sumala pa ni Encina, padulong unta sa Cebu International Port ang maong barko apan nasangad sa dihang pasulod na sila sa traffic separation scheme diha sa baba sa Mactan Channel.

Ang Marine Environmental Protection Unit sa Coast Guard daling misusi sa dapit ug ingon man sa maong barko nga adtong higayona dunay dalang 287,167 ka litrong bunker fuel nga maoy nagpadagan niini.

Wala hinuoy natalang dakong danyos sa kasko sa maong barko nga posibleng makamugna og oil spill o makapalunod niini diha sa maong dapit.

Hinuon natangtang ra sab gikan sa pagkasangad ang moang barko human nasigurong makapadayon gihapon kini sa paglawig ug sa pagkakaron gipaangkorahe una kini sa kadagatan sa Dakbayan sa Talisay.

Base sa port state control inspection ang barko adunay balido nga papeles apan matud pa ni Encina “The vessel papers are all valid, however deficiency report was issued to subject vessel in relation to the incident (code 17- rectify before departure). Further, the Master/owner is required to undergo Underwater Hull Inspection/survey from Classification Society and submit report prior its departure,” dugang pasabot sa coastguard.— (/IBM)(BANATNEWS)