E-trikes gideklara nga duwaan?

CEBU, Philippines — Atol sa gipahigayong 888 News Forum niadtong Martes gibutyag sa Land Transportation Office (LTO)-7 nga adunay duha ka klase ang e-trikes.

Ang unang klase sa e-trikes mao ang nag-agi sa saktong proseso ug giila na sa Department of Trade and Industry, LTO ug Department of Energy.

Ang pasabot niini nga ang maong mga sakyanan mamahimong marehistro isip e-bike o e-trikes.

Matud sa director sa LTO-7 Victor Caindec nga kining klase sa e-trikes mamahimong makadagan apan diha lang sa pinili nga mga rota ug kong buot nila nga makabiyahe sa mga munisipyo gikinahanglang mokuha sila og prangkisa niini gikan sa Local Government Unit (LGU) sama sa mga tricycle.

Ang maong mga e-trike dili kini tugotan nga makabiyahe diha sa mga national road o highway.

Ang ikaduhang klase mao ang kasagarang makita sa mga kadalanan ug mga gipangbaligya diha sa mga mall nga sa pag-import niini gi-classify kini nga duwaan ug wala niagi sa saktong proseso.

Ug kay gi-classify man kini isip duwaan dili kini mamahimong marehistro sa LTO ug dili usab kini pwedeng makadagan sa national roads kay wala sila’y mapakitang dokumento niini sama sa rehistro.

Matud usab ni Caindec nga ang mga tigbaligya sa e-trikes giingong mosulti ngadto sa ilang mga buyer nga dili na sila kinahanglan magparehistro ug dili na usab kinahanglan mokuha og lisensiya.

“This is the biggest lie that they are peddling”, padayag ni Caindec.

Gitataw ni Caindec nga ang mga ma-impound nga e-trikes i-release lang kini kong ang tag-iya niini adunay mapakitang dokumento sama sa rehistro sa maong sakyanan nga nagpamatuod nga ilaha kini.

Nakig-alayon na usab ang LTO-7 sa DTI kabahin sa legal actions nga ilang mapahamtang ngadto sa mga supplier sa maong mga ilegal nga e-trikes.

“We will be very serious about this because it is risking the lives of people everyday”,  dugang ni Caindec. (Beverly I. Manla, CNU Intern/BDB)  (BANAT NEWS)