Tomas nagduda sa pag-usab sa BRT Project

CEBU, Philippines – Gihulagway ni kanhi Cebu City mayor Tomas Osmeña nga usa ka “ploy” ang pag-amendar sa pag-align sa Cebu Bus Rapid Transit (BRT) Project.

Si Osmeña maoy unang nagplano sa BRT sukad pa niadtong 1990s apan gisupak kini sa iyang mga kritiko ug kaatbang sa politika. Kabahin sa alignment, ang bag-ong rota sa BRT wagtangon ang Natalio Bacalso Avenue ug Banilad-Talamban corridor tungod sa kagamay sa dalan.

“It’s a ploy to cancel the BRT. There is no population base at the SRP who will use the new SRP route,” sigun sa kanhi mayor. Ang orihinal nga rota sa 23 kilometros nga BRT Project maggikan sa Barangay Bulacao, Cebu City ug moagi sa N. Bacalso Avenue, South Road Properties, Osmeña Boulevard, Escario Street ug Governor Cuenco Avenue paingon sa Talamban.

Si Osmeña nagkanayon nga ang pagkanselar sa Banilad-Talamban corridor nagpasabot nga daghang tuig nga pag-antus.

Dugan niya nga magkinahanglan kini og lima hangtud 10 ka tuig aron mahimo ang usa ka monorail.

Apan ang Department of Transportation ug ang Office of the Presidential Assistant for the Visayas nisaad nga ipatuman ang BRT Project tungod kay kini gilakip sa Integrated Intermodal Transport System alang sa Metro Cebu. Ang mga proyekto nga gilakip sa IITS mao ang bus-to-point (P2P); monorail sa Dakbayan sa Lapu-Lapu; BRT sa tulo ka lanes nga kadalanan; Light Rail Transit (LRT) gikan sa Dakbayan sa Carcar paingon sa Dakbayan sa Danao ug Dakbayan sa Mandaue paingon sa Airport Line; ug Intelligent Transportation System.

Samtang ang konseho sa Siyudad sa Sugbo buot masayud sa kalamboan sa multi-billion BRT Project gikan sa mga consultant ug DOTr. Atol sa ilang sesyon niadtong Martes, giaprobahan ang resolusyon ni Konsehal Nestor Archival nga mag-imbitar sa taga DOTr pinaagi sa ilang Technical Support Consultant alang sa usa ka executive session aron pasabton sila kabahin sa proyekto. (/GMR)(BANAT NEWS)