Upat ka polis gi-ambush patay
CEBU, Philippines – Upat ka mga polis ang namatay human sila gi-ambush sa mga gidudahang mga sakop sa New Peoples Army samtang ang grupo nagpahigayon og surveillance operations sa bukirang bahin sa Sitio Yamot, Barangay Mabato sa Lungsod sa Ayungon Negros Oriental niadtong Huwebes. Ang upat ka pulis giila nga sila si Police Corporal Relebert Beronio, Patrolman Raffy Callo; Patrolman Roel Cabellon; ug Patrolman Marquino de Leon pulos mga sakop sa Regional Mobile Force Batallion-7.
Sigon pa sa kadagkoan sa kapolisan, gi-assign sila sa lugar aron beripikahon ang mga nadaat nilang impormasyon kabahin sa nasigpatang mga armadong lalaki nga gituohang sakop sa NPA. Apan sa pagabot nila sa lugar ug padung unta mosulod sa balay sa usa ka Oto Anadon, kalit nga nibutho ang upat ka armadong mga lalaki nga nagsakay og duha ka motor ug diretsong girakrakan ang mga polis. Human nangahagba ang mga biktima, gikuha sa maong mga lalaki ang issued firearms sa upat ka pulsi ug daling niikyas padung sa bukirong bahin sa Barangay Mabato.
Agi og pagpakita sa ilang pahasubo ug pagbangotan, ang Police Regional Office-7 mibutang sa Bandila sa Pilipinas sa half-mast. “All concerned police units in the field shall not lower their guards and personnel must continue to be on alert, security-conscious and battle-ready to ensure that no similar untoward incident will happen in the future,”sigon pa sa direktiba ni Police Brigadier General Debold Sinas.
Samtang si Police Colonel Raul Tacaca ang Provincial Police Director sa Negros Oriental Provincial Police Office miklaro sa nigawas nga mga report nga gipamunggotan og ulo ang mga biktima. Matud niya tanang biktima gipamusil sa ulo.
Wa hinuon ibutyag kun ang mga samad sa ulo inagian sa pagbanhig o kun gipangtiwasan ang mga polis sa mga mamumuno human sila nangahagba.
Gibutyag hinuon ni Tacaca nga ang usa sa mga mamumuno positibong nailhan sa testigo ug gikatakda na nilang pasakaan og kaso.
Tungod sa hitabo, nakig-alayon ang kapolisan sa Armed Forces of the Philippines alang sa pangusgang operasyon batok sa terorismo. (/IBM)(BANAT NEWS)
- Latest
