2 aksidente, 9 patay kapin 20 angol

CEBU, Philippines – Duha ka mga dagkong aksidente sa kadalanan ang nahitabo kagahapong adlawa nga nikalas og siyam ka tawo ug niangol og kapin 20 ka mga tawo sa habagatang bahin sa lalawigan sa Sugbo.

Sa  aksidente sa Barangay Upper Bicerril  Lungsod sa Boljoon, nalimbuwad ang usa ka dumptruck nga nagkarga og mga tinun-an ug pipila ka mga ginikanan nga mosalmot unta sa sangka sa District Nutritional Cultural and Sports Meet sa Barangay Poblacion sa mao gihapong lungsod diin siyam ka mga estudyante ang nakalas ug dul-an sa 20 na ang angol.

Base sa imbestigasyon ni Police Staff Sergeant Nelson Saquibal sa pakighinabi sa Banat News  dunay di momenus 30 ka tawo ang sakay sa maong mini- dump truck gikan sa may Sitio Lintongan, 12 ka kilometros ang gilay-on gikan sa highway dihang nawagtangan og kontrol sa manobela ang drayber nga si Danilo Niero.

“Nag-maneuver ni siya sa descending road unya na lost control siya. Kay nitakilid sa tuo ang  truck. Wala pud pangpang ang area pero dulhugon,” sigon pa ni Saquibal.

Ang namatay base sa ilang nahipos nga report mao sila si Jerome Niere, 11,; Mary Ann Filipino, 12; Janna Delos Santos, 12; Clint Isidore Dugang, 10; Victoria Gorozon, 40; Jefferson Jorpo, 11; Alexander Villanueva, 20; Mark Loyd Mosqueda,12; Riza Mae Viñan,10, pulos residente sa Barangay Nangka.

Samtang ang samdan mao sila si Angel Ceciban, 10; Elvie Jean Gorozon,9; Aga Oliveros, 12; Reyan Bentazal, 10; Lutchie May Rota,11; Roy Endrina,9; Alexes Alloso,10; Analyn Legarte, 10; Gracia Denuyo, 10; Thea Joy Felipe,8; Bernie Niere,11; Roxan Endrina,11; Chan Love Mie Endrina,27; Imee Rivas, 11; Annrose Niere, 11, pulos gidala sa tambalanan ug ang uban sa Vicente Sotto Memorial Medical Center.

Sigon pa sa tigpamaba sa lokal na kagahamnan sa Boljoon, nga si Ruben Niere, nihangyo ang Department of Education na manghulam sa dump truck nila aron paghatod kuha sa mga tinun-an sa Nangka Elementary School aron pagsalmot sa District Cultural Sports Festival na buhaton  sa Barangay Poblacion.

Walay laing masakyan ang mga bata gawas sa mini dumpt truck kay mahal ang plete sa habal-habal.

Daling nipatawag og emergency meeting si Boljoon Mayor Merlu Derama aron ilang masabutan sa konseho kung unsa nga tabang ang ilang mahatag sa mga biktima.

Giawhag ni Saquibal ang mga ginikanan sa bata nga mopasaka og kaso aron ilaha mapatubag ang driver sa kasong reckless imprudence resulting to multiple homicide, multiple physical injuries and damage to property.

Sa pikas bahin,  sayo gihapon kagahapon sa kaadlawon usa ka Ceres Bus nga adunay body no 8002 ang nawagtangan og kontrol sa may Barangay Gawi sa Lungsod sa Oslob  ug niresulta sa pagkaangol sa mga pasahero niini.

Ang maong bus gimaneho ni Jesus Lozano ug ang konduktor mao si Rolando Vallecee. Ang mga naangol naglangkob nila ni Veronica Justiniae, Maria Nina Pineda, Muffet Sakall Daniel, Pacey Daniel, Ainie Daniel, Cherry Gil Laroga, Ruben Tizon, Rolando Jane, Aurora Alegre, Erma Roze, Alejandro Roze, Mercy Mauch, Gerald Bureros, Rio Razel Doring, Corazon Campo ug Mark Christian Campo.

Matud pa ni Police Corporal Judel Rivera sa Oslob Police Station padulong sa habagatan ang bus apan pag-abot sa maong lugar nawagtangan og control sa manobela ang drayber ug natagak sa bakilid.

Ang mga angol nalandig sa tambalanan samtang giandam na ang kaso batok sa drayber. (Rowena Capistrano/IBM)(BANAT NEWS)