Talento sa pintor nagamit sulod sa prisohan

CEBU, Philippines – Wala mausik ang talento sa usa ka pintor bisan og anaa kini sulod sa prisohan gumikan sa sala nga iyang nabuhat. Atol sa pagbisita ni Gobernadora Gwendolyn Garcia sa Cebu Provincial Detention and Rehabilitation Center (CPDRC) kagahapon, lakip sa iyang naatlan ang  binilanggo nga pintor nga si Herbert Villarante, lumad nga taga Brgy. Pulpogan sa Lungsod sa Consolacion.

Si Villarante kinsa usa ka tuig nang napriso sa maong pasilidad gumikan sa kaso nga iyang giatubang human malambigit sa ilegal nga drugas, mipakita sa iyang obra maestra diin usa ka babaye ang iyang gi-drawing gamit lamang ang charcoal o uling nga lapis.

Matud niya nga daku kaayo og tabang ang iyang pagpinta bisan anaa sa sulod sa prisohan kay gawas nga aduna siyay tinigum, makaabag usab kini sa iyang galastuhan sa sulod.

Asoy niya nga dili siya mobungat kon pila ang iyang talent fee, sanglit magdepende ra kini niadtong gustong mopalit ug magpadrawing.

“Ang bayad kay magdepende ra man kung pila ang ilang ihatag sa akoa” matud pa niya.

Usa lang si Villarante ang padayong nakabenepisyo sa ilang talento diin aduna silay makita samtanag anaa sulod sa prisohan. (/DILT)(BANAT NEWS)