Babaye, kabit gipadakop

CEBU, Philippines – Arestado ang usa ka ginang ug ang iyang kabit human sila gipadakop sa bana kay naaktohan nga nagdulog sa giabangang balay sa may Sitio Dapdap, Barangay Mactan Dakbayan sa Lapu-Lapu niadtong Huwebes sa kaadlawon.

Ang 36 anyos nga bana kinsa usa ka drayber ug mekaniko midangop sa kapolisan ug nagpatabang aron sikupon ang iiyang 35 anyos nga asawa u gang kabit niining 36-anyos nga tigtaod og tiles.

Matud pa ni Police Master Sergeant Raymund Sosmeña, Desk Officer sa Station 2 sa Lapu-Lapu Police Station nagpakitabang sa ilang buhatan ang bana sa mga dinakpan kay nakit-an niya ang iyang asawa nga natulog sa balay sa giingong uyab niini.

Kuyog sa kapulisan ang bana ug mga saksi dali nilang giadto ang panimalay kung diin giingon nagpuyo ang kabit ug didto naaktohan nga nagtupad sila sa pagpangatulog.

Ang asawa naka shorts ug naka sleeveless samtang ang kabit niini naka boxer shorts lang. Ang bana desididong mopasaka og kaso batok sa duha.

Sumala pa ni Sosmeña, ang asawa nangangkon nga nagkasinabot na sila sa iyang bana nga wala nay hilabtanay tungod kay aduna usab kini uyab-uyab.

 Apan wala kini masayod kung nganung gipapriso pa sila kuyog sa iyang kabit. Ang maong magtiayon adunay tulo ka mga anak nga nagpangidaron ug 12, 9 ug 8. (/IBM)(BANAT NEWS)