WT wa nagtagad sa ultimatum
CEBU, Philippines – Wala pa gihapon kadawat ang Kapitolyo og tubag gikan sa WT Construction kun motuman ba kini sa kamanduan ni Gobernador Gwendolyn Garcia nga bonbonan pagbalik ang gikawtan nga tukuran unta sa Capitol Resource Center.
Si Garcia nihatag lang og 48-oras nga ultimatum nga napupos na kagahapon apan sa pagsuwat niining balita wala pay tubag nga nadawat ang Kapitolyo gikan sa kontraktor.
Matud sa gobernador nga kun walay himoon ang WT Construction i-blacklist kini sa kagamhanan sa lalawigan. Si Bise Gobernador Hilario Davide III nga maoy nagpasiugda sa maong proyekto nagkanayon nga anaa na sa kontraktor kun motuman kini sa mando ni Garcia.
Kini nipahimangno nga posibleng mag-atubang na hinoon og kaso ang WT Construction kun dili kini motuman sa kontrata nga gipirmahan atol sa iyang administrasyon.
Ang P1.3 bilyones nga resource center gisugdan sa naghinapos nga bahin sa termino ni Davide apan walay plano si Garcia nga kini ipadayon. (/GMR)(BANAT NEWS)
- Latest
