Tinun-an sa kolehiyo gidagit, gilugos

CEBU, Philippines – Usa ka 19-anyos nga kolehiyala ang giingong gidagit ug gilugos sulod sa usa ka puti nga van dihang naglakaw siya pauli sa may Governor Cuenco, (Foodland), Banilad, Cebu City. Sigun pa sa hepe sa Women’s and Children’s Protection Desk sa Cebu City Police Office, Police Lieutenant Erlinda Mayam, nga nahitabo ang insidente niadto pang Hulyo 10 sa alas singko sa hapon.

Ang biktima giingong gihunungan sa usa ka puti nga van diin adunay duha ka lalaki ang nikanaug nga nag-bonnet ug maoy nitabon sa mata ug baba sa biktima dayun gipasulod sa van ug didto gipanamastamasan. Human niini gibalik ra sab ang biktima sa lugar diin siya gidagit ug gibaharan nga patyon ang iyang pamilya kung mosumbong siya sa mga polis.

Apan nisumbong gyud ang biktima sa Mabolo Police Station diin naghilak kini nga niasoy sa iyang gidangatan ug gidala sa hospital aron mahiling sa doktor.

Sa pagkakaron wala pa ang resulta nga mopamatuod nga nahilabtan ang pagkababaye sa biktima.

Si CCPO director, Colonel Gemma Vinluan, niingon nga dili sila matagbaw samtang dili masikop ang mga responsable sa krimin.  Matud niya nga gisuwayan sila karon human siya nideklarar nga aduna siyay programa nga tukhangon pag-apil ang mga manglugos.

“Subukan nila na mang-rape ngayon at hahanapin ko sila, ipapasara ko ang Cebu City para makita sila, hindi tayo maglolokohan dito,” sigun pa niya.

Si Vinluan nikonsiderar sa kaso nga “high-priority case.” Samtang pahimangno ni Mayam nga magbantay ang kababayen-an sa ilang palibot. “Ang oras man gud, ang ingon ani na sakyanan, dapat cautious sila, dili sila mag-inusara adto sila sa daghana na tawo. Kalit kaayo ang panghitabo, kinsa mana ang mag-expect na five kapin mahitabo,” sigun pa ni Mayam. (/GMR)(BANAT NEWS)