Aroganteng drayber ikiha sa talisay

CEBU, Philippines – Pasakaan og kaso kadtong mga arogante nga motorista sa Dakbayan sa Talisay.

Si Jonathan Tumulak, kinsa traffic czar sa dakbayan, nitug-an nga klase-klase ang mga istilo sa motorista nga ilang masita o maisyuhan og citation ticket.

Siya nagkanayon nga adunay motorista nga nakasabot sa ilang trabaho apan aduna say mga arogante sama sa ilang pagkumot sa citation ticket ug ilabay ngadto sa mga sakop sa City of Talisay-Traffic Operation Development Authority (CT-TODA).

Gipahinumduman ni Tumulak ang iyang mga sakop nga dili nalang mopatol sa mga klase nga tawo inay i-rekord lang ang ilang mga pangalan aron pasakaan og kaso.

Matud pa niya nga niabot na sa 1,400 ang naisyuhan og citation ticket nga wala mobayad sa ilang mga multa.

Sama sa iyang gibuhat sa Dakbayan sa Sugbo, iyang pasakaan og kasong kriminal ang dili mohatag og bili sa ilang giisyu.

Sigun pa ni Tumulak nga maglabad gyud ang ulo sa mga badlungong motorista kay malutsan man gyud sila og warrant of arrest nga posibleng makatulog gyud sila sa prisohan.

Gipasabot niya nga dili  makakwarta ang siyudad sa ilang gibuhat kun dili madisiplina ang katawhan sa natad sa lagda sa trapiko.

Samtang sa laing bahin ang sweldo alang sa mga public utility vehicles (PUV) drivers ang lakip sa modernization program sa Land Transportation Franchising and Regulatory Board (LTFRB).

Pasabot niini nga ang mga operators sa  mga PUV na ang mosweldo sa mga drayber sanglit wala na silay kwarta nga makuptan nunot sa automatic fare collection diin ang plite ipaagi na sa card.

“Ang automatic fare collection applicable lamang sa mga highly-urbanized cities apan sa mga bukid ug mga walay signal nga dapit dili kini magamit,” matud ni Rey Elnar sa LTFRB-7 atol sa 888 News Forum sa Marco Polo Plaza niadtong Martes.

Wala pa hinoon matino kung pila ang sweldo sa mga drayber. Tumong niini nga dili na magkompetensiyahanay ang mga drayber diha sa kadalanan ug dili na mag-ilogay sa mga pasahero. (Beverly I. Manla/GMR)(BANAT NEWS)