Bangka sa Malapascua gisilotan
CEBU, Philippines — Gipahamtangan og silot ni Daanbantayan Mayor Sun Shimura ang usa ka operator sa bangka human gireklamo og overcharging sa gisingil nga plite sa pasahero nga langyaw.
Sa imbestigasyon nga gihimo sa port supervisor nga si Renato Benatiro namatud-an nga ang kapitan sa bangka naningil og P1,000 sa usa ka pasahero isip special trip.
Kini aron iyang makuha ang kita nga P1,500 sanglit aduna na man siyay upat ka lokal nga pasahero nga niplite og tag P100 gikan sa Isla sa Malapascua padulong sa pantalan sa Maya.
Apan dakung katingala sa pasaherong langyaw nga 10 ka tawo ang iyang kasakay sa maong biyahe.
Gisuspenso og usa ka adlaw ang biyahe sa maong bangka ingon man ang kapitan niini isip silot sa unang kalapasan.
Si Shimura nanawagan sa publiko nga motaho sa iyang buhatan kung makasugat og susamang problema. “We the LGU will and never tolerate these kind of transactions,” matud ni Shimura. (Beverly I. Manla, CNU Intern/GMR) (BANAT NEWS)
- Latest
