Habalhabal drivers patabangon sa kahapsay ug kalinaw

CEBU, Philippines — Patabangon sa kapolisan sa Lungsod sa Minglanilla ang mga drayber sa habalhabal sa pagpabilin sa kahapsay ug kalinaw sa maong lugar.

Ang bag-ong hepe sa lungsod nga si Police Captain June Tabigo-on nakigtagbo sa mga habalhabal drivers aron sila himamaton ug hangyuon nga patabangon sa kampanya sa kapolisan.

Nakasabot si Tabigo-on sa panginabuhi sa mga habalhabal drivers apan kinahangalan usab sila nga mosunod sa lagda sa trapiko ilabi na sa pagsul-ob og helmet, pagmaneho nga adunay lisensya ug dili magbabag sa karsada nga makatampo na hinuon sa trapiko.

Gihangyo sila sa maong hepe nga dili magpaugatay sa ilang panginabuhian ug magsinabtanay aron mahilayo sa away.

Naglaraw si Tabigo-on nga maghimo og color coding sa grupo sa mga habalhabal aron dali nga mailhan kadtong mga tawo nga dautan nga motorsiklo usab ang gamit.

Nasayod ang otoridad nga daghang impormasyon ang mahatag sa mga habalhabal drivers ngadto kanila kay sila man ang anaa sa karsada ug suhito sa panghitabo. Laing hangyo ni Tabigo-on kanila nga unta dili sila magpanuko sa paghatag og impormasyon aron dali usab nila nga masumpo ang mga dautang elemento ilabi na gyud ang ilang gihatagan og prayoridad ang suliran sa ilegal nga drugas. (/DILT)(BANATNEWS)