Central Visayas luwas sa hulga sa terorismo–Sinas
CEBU, Philippines – Nipasalig ang direktor sa kapolisan sa rehiyon-7 nga walay hulga sa terorismo ang Sugbo ug ang kinatibuk-an sa Central Visayas.
Matud ni Police Brigadier General Debold Sinas nga ang suicide bomber kinsa niatake ngadto sa Indanan, Sulu niadtong Hunyo 28 nailhan na kini nga si Norman Lasuca kinsa usa usab kini ka Pilipino.
Sa report sa Rappler, nailhan sa Philippine National Police Crime Laboratory ang maong suicide bomber ubos sa DNA-matching human ang inahan niini nga si Velman Alam Lasuca ug igsuon nga laki nga si Alhussin Alam Lasuca ang nakuhaan og DNA sample.
Matud ni Sinas nga nakaalarma sa kadagkuan sa kapolisan ug sa kasundalohan ang hitabo tungod kay kini mao ang pinakauna nga adunay Pilipino nga nahimong suicide bomber.
“We are very concerned and alarmed ato because it is the first time, na it was confirmed na Filipino, a balik Islam ang suicide bomber”, matud ni Sinas.
Kahinumduman nga niadtong Hunyo 28, duha ka lalaki ang kalit lang nisulod sa kampo sa Philippine Army’s 1st Brigade Combat Team (BCT) sa Indanan.
Si Norman Lasuca nga nagdala sa improvised explosive device ang nibuto ug nahimong distraction aron makadagan ang ikaduha niyang kauban sulod sa kampo apan napusilan kini sa mga sundalo hinungdan sa pagbuto sa bomba.
Pito ka tawo ang namatay sa maong hitabo nga gilangkuban sa tulo ka sundalo, duha ka sibilyan ug ang duha ka suicide bomber.
Ang inahan ni Norman niduol sa awtoridad niadtong Hulyo 2, 2019 ug nibutyag nga nawala iyang anak niadtong tuig 2014. (/BDB)(BANAT NEWS)
- Latest
