Bagong police station tukoron sa Liloan

CEBU, Philippines – Gitakda na ang kaugmaran sa tukoron nga tulo ka andana nga edipisyo sa bag-ong police station sa kapolisan sa Lungsod sa Liloan diin anha kini ipahimutang sa luna nga adunay gilapdon nga 600  metro  kuwadrado diha sa tuo nga bahin sa Panphil B. Frasco Public Market sa Barangay Jubay.

Si Liloan Mayor Christina Garcia-Frasco nibutyag nga ang P8 milyones nga bag-ong police station ang ugmaron pinaagi sa panaglambigit sa lokal nga kagamhanan sa maong lungsod ug sa kapolisan.

Ang kasamtangang police station sa lungsod naa mahimutang duol sa munisipyo sa Barangay Poblacion tapad sa fire station.

Niadtong Hulyo 8, 2019 gipahigayon ang groundbreaking ceremony nga gitambongan usab sa mga opisyal sa lokal nga kagamhanan sa lungsod ug mga opisyal sa kapolisan.

Lakip sa nitambong sa maong kalihukan sila si Police Regional Office (PRO)-Central Visayas Deputy Regional Director for Administration Ildebrandi Usana ug  Cebu Police Provincial Office (CPPO) Director Roderick Mariano uban sa hepe sa kapolisan sa maong lungsod nga si Police Major Danilo Colipano.

Sa nasayran ang Liloan Police Station ang napasidunggan isip numero uno nga police station sa  Sugbo ubos sa President  Rodrigo Duterte’s Double Barrel program ug nidaog usab kini isip champion sa  Sugbo Kontra Druga Program nga gipasiugdahan sa kagamhanan sa Lalawigan sa Sugbo. (/BDB)(BANAT NEWS)