Gwen: Pagbalik sa kapitolyo milagro
CEBU, Philippines — Gihulagway ni incoming Governor Gwendolyn Garcia nga milagro ang paghibalik niya sa Kapitolyo.
Atol sa iyang mensahe sa oath taking ceremony kagahapon, siya nagkanayon nga kaniadto nagtoo siya nga dili kabalik sa Kapitolyo.
“This miracle has happen by God’s grace. Once again Gwen Garcia is back to serve,” matud ni Garcia.
Si Garcia nanumpa atubangan ni Justice Edgardo delos Santos, Executive Justice sa Court of Appeals-Visayas.
Apil usab nga nanumpa ang mga kongresista, bokal, mayor, bise mayor ug mga konsehal nga ilang alyado.
Kagahapon sa buntag atol sa turnover ceremony, nagkuyog si outgoing Governor Hilario Davide III ug Garcia sa pagsulod Capitol Sociall Hall.
Si Davide sa iyang mensahe nagkanayon nga nagtuo siya nga mas molambo pa ang Probinsiya sa Sugbo ubos sa liderato ni Garcia.
“Today with dignity and pride, I humbly pass on to Governor-elect Gwen Garcia the Capitol leadership knowing fully well that we have done our best,” matud ni Davide.
Niadtong 2013 si Garcia ang ni-turnover sa Kapitolyo ngadto kang Davide ug karon siya na sab ang nidawat.
Apil sa mga gi-turnover nga dokumento mao ang Annual Investment Plan, budget sa Kapitolyo karong tuiga, inventory sa mga properties sa Kapitolyo ug uban pa.
Gipaneguro sab ni Garcia nga mosubay ang bag-ong administrasyon sa qualification standards sa pagpili sa mga empleyado nga magpabilin sa Kapitolyo.
Dul-an sa 3,000 ka job order personnel, casual ug contract of service nga mga kawani ang naghuwat sa listahan kun kinsa kanila ang magpabilin ug makabalik pa sa Hulyo 1 sa trabaho. (/GMR)(BANATNEWS)
- Latest
