BFAR: Oarfish di kabalak-an

CEBU, Philippines – Gitataw sa Bureau of Fisheries and Aquatic Resources nga walay angay kabalak-an sa pagtumaw sa patay nga oarfish sa baybayon sa Poblacion, Lungsod sa Compostela.

Ang oarfish adunay gitas-on nga 13.9 feet ug 1.6 feet ang gilapdon.

Matud ni BFAR-7 Director Alfeo Piloton nga wala siyay nakita nga koneksiyon nga adunay kalamidad ang paggawas sa oarfish kung dili tinuohan lang kini sa mga katiguwangan.

Sumala pa ni Piloton nga tungod kay anaa man sa ilawom nga mga lungag ug langub ang pinuy-anan sa oarfish, daku ang purohan nga posibleng nadisturbo ang nahimutangan niini nga maoy  kasagaran hinungdan sa pagpanggawas niini.

Dugang pa ni Piloton nga usahay ang kalit-kalit nga kausaban sa temperatura mao sab ang hinungdan sa paggawas sa oarfish apan wala kini koneksiyon sa katalagman nga maoy gituohan sa kadaghanan.

Daku ang pagtuo ni Piloton nga ang nabangalan nga oarfish nga nakit-ang patay na posibleng masakiton. Awhag niya sa katawhan nga sa higayon nga dunay makit-an nga susama niini ipahibalo dayon sa lokal nga kagamhanan ug kinahanglan sab ilubong dayon ug dili kan-on tungod kay basin og makahatag hinoon kini og kadaut. Gipasabot ni Piloton nga medyo ngil-ad og nawong ang maong matang sa oarfish ug tag-as ug lagpad tungod kay anaa kini nahimutang sa pinakailawom na kaayo nga lungag nga dili na maabot sa mga mangingisda apan kauban ug pamilya ra kini sa isda nga diwit.

Samtang ang tigpamaba sa Office of Civil Defense nga si Rizajoy Hernandez nibutyag nga dili angay mag-panic ang katawhan sa nagpatim-aw nga oarfish. Hinoon mas maayo nga mangandam sila sa tanang higayon aron kung aduna may moabot nga katalagman o wala andam sila kanunay. Dugang ni Hernandez nga pwede motuo ug dili sa mga haka-haka tungod kay panagsa ra sab magpakita ang maong klase sa isda apan walay laing makatabang sa tawo kung dili ang pagpangandam kaysa mag-panic tungod kay dili kini makatabang. (/GMR)(BANAT NEWS)