Provincial engineer nirisgo sa ‘Tore’
CEBU, Philippines – Girisgo sa provincial engineer ang iyang kaugalingon sa pamahayag niini kalabot sa 20-storey resource center.
Kini sumala pa ni Atty. Marino Martinquilla, sakop sa transition team ni Governor-elect Gwendolyn Garcia.
Si Provincial Engineer Hector Jamora nagkanayon nga magpadayon gihapon ang pagtrabaho sa resource center bisan pa og wala aprobahe ang pasiunang bayad nga P194 milyones ngadto sa kontraktor nga mao ang WT Construction.
"They are doing it at their own risk and it’s also a risk on the part of engineer Jamora for making that statement to the probably put him administratively in hot water," matud ni Martinquilla.
Ang kampo ni Garcia pipila na ka higayon nga niawhag ug nipahimangno sa kasamtangang administrasyon sa Kapitolyo nga iundang ang pagpatrabaho sa proyekto apan hangtud karon padayon gihapon ang pagkubkob sa tukuran niini sulod sa Capitol compound.
Si outgoing Governor Hilario Davide III nagkanayon nga ang kamanduan sa korte lang ang makapahunong sa trabaho sanglit aduna nay nag-ung-ong nga kaso sa korte.
Si Garcia nitataw nga wala siyay plano nga ipadayon ang maong proyekto nga iyang gihulagway nga usik lang sa kwarta sa Probinsiya sa Sugbo ug iyang ginganlan og “Tore ni Davide.” (/GMR)(BANAT NEWS)
- Latest
