Balay sa mga sundawo sa Barangay Apas demolisonon

CEBU, Philippines — Pipila ka active ug retiradong sundalo ang nag-andam sa ilang kaugalingon aron ipahunong ang nag-ung-ong nga demolisyon sa ilang kabalayan sa Sitio San Miguel, Apas, Siyudad sa Sugbo.

Kagahapon mao unta ang unang adlaw sa demolisyon subay sa mando sa Regional Trial Court Cebu City Branch 9 nga ipatuman.

Apan sigun sa presidente sa Archangel’s Residents Mergence Inc. (ARMI), Anne Martel, ang grupo nakadawat og report nga ang court sheriff napakyas sa pagkuha og clearance gikan sa buhatan sa kapolisan sa pagpatuman sa demolisyon.

“Kami, mga sundalo baya mi. Kahibalo mi sa kamatuoran. Nagdepensa mi sa country. Gusto namo nga tagaan pud mi sa equal treatment sa law nga kami, respetoon pud among katungod for due process ug dunay katungod nga dili ma-demolish kay dugay na mi namuyo dinhing lugara,” matud ni Martel.

Sigun ni Martel nga ang iyang amahan lakip sa retiradong sundalo nga gitugutan nga makatukod og balay sa lugar niadtong 1960s. Kagahapon ang mga officers sa association ug ubang residente sa lugar nagsul-ob og itom nga t-shirt nga dunay suwat nga “Saving Lot 937”. Matud ni Martel nga dunay daghang retired army personnel ug laing indibidwal ang nagkatag sa dapit aron pagseguro nga ang demolisyon dili mapatuman.

Ang korte niisyu og writ of execution sa demolisyon sa Lot 937, usa ka 4.5 hectare property sa Sitio San Miguel nga giokupahan sa 205 ka pamilya sa active ug retiradong sundalo.

Nasayran ang schedule sa demolisyon gikan sa Hunyo 17 hangtud sa Hunyo 28.

Gihangyo ni Martel ang korte nga huwaton ang ruling sa petition aron ipahunong ang demolisyon dungan sa pagbutyag nga ang Lot 937 iya sa gobiyerno.

Kahinumduman ang korte ni-grant sa motion ni Mariano Godinez, claimant sa property, nga i-implementar ang writ of demolition sa kabalayan sa dapit.

Niadtong 2010 dihang si Godinez nisang-at og kaso aron bawion ang Lot 937 nga giokupahan sa mga active ug retired army uban sa ilang pamilya.

Asoy ni Martel nga ang mga residente dugay na nagpuyo sa dapit apan wala pa gyud nila makita si Godinez. Kini nidugang nga ang relokasyon sa pamilya naa sa Lot 1112 sa Barangay Apas apan nigawas nga iya kini sa Central Command maong dili sila makabalhin didto.

Sayong bahin sa buwan sa Marso niining tuiga, ang korte niisyu sab og writ of execution/writ of demolition sa samang property apan wala napatuman. (BANAT NEWS)