Underpass hingpit nang maagian

CEBU, Philippines — Makahingawa na gyud ang sumasakay ingon man ang mga motorista sa habagatang bahin sa Siyudad sa Sugbo human hingpit na nga gibuksan kagahapon ang P648 million underpass project diha sa Natalio Bacalso Avenue.

Kahinumduman nga misaad ang Department of Public Works and Highways (DPWH)-7 nga ablihan gyud nila ang underpass sa petsa Hunyo 15 ug ila gyud kining natuman. Pasado alas noybe sa buntag kagahapon, gibuksan ang underpass apan sa wala pa kini paagi og mga sakyanan, gibendisyonan una kini uban ang taga DPWH, WT Construction Inc. nga maoy konrtaktor sa proyekto ingon ang Cebu City Transportation Office (CCTO).

Subay niini, ang operations chief sa CCTO nga si Francisco Ouano miingon dihang giablihan nila ang underpass, makita nga nakatabang gyud kini aron maluag-luagan ang kahuot sa trapiko sa dapit.

Ang gipatuman nila nga traffic scheme mao nga ang mga PUJ adto agi sa southbound ug northbound side roads, samtang ang mga private vehicles ug mga dagkung trak, adto sa agi sa underpass.

Aduna hinuon silay gipatuman nga truck ban nga magsugod sa alas sais sa hangtud sa alas otso sa buntag ug alas kwatro hangtud sa alas siete sa gabii.

Gipahibawo usab ni Ouano nga gidid-an gihapon nila ang buses ug mini buses nga moagi sa N. Bacalso Ave. kay nakita nila nga niabot na kini og 600 ug dili nila mahimong ikompromiso ang mga estudyante ingon mga trabahante.

Dugang pasabot ni Ouano nga gitugotan nila nga makaagi sa N. Bacalso Ave. ang KMK buses ug My Bus buses kay aduna man silay prangkisa nga adunay rota gikan sa Talisay ug aduna sab silay bus stop sa Brgy. Inawayan, Basak Pardo ug Mambaling.

Anaa lang gihapon ang alternate route nga gipatuman sama sa mga dalan sa Macopa ug Bontores aron mabahin ang mga sakyanan.

Aduna say mga traffic enforcers nga ipakatap aron mobantay sa dagan sa trapiko diha sa underpass, tulo ang i-assign sa buntag samtang laing tulo sa hapon.

Samtang si DPWH-7 project Engineer Roy dela Cruz nalipay nga nabuksan na gyud ang underpass ug kini miasoy nga positibo ang resulta niini.

Dugang niya nga 99.9 percent na nga kumpleto ang maong underpass dungan sa pagbutyag nga basin adunay mga correction nga himuon depende sa inspection report sa Quality Assurance Unit.

Wala pay petsa kon kanus-a ang inagurasyon niini apan sigon ni Engr. dela Cruz nga mahimo rang buhaton ang maong kalihukan diin sirad-an lang og pila ka oras ang underpass ug buksan ra usab og balik kon mahuman na ang seremonyas. (/DILT)(BANATNEWS)