Dugang kaso batok Organico ug Ada Farm

CEBU, Philippines — Gawas sa kalapasan sa Securities Regulation Code, duha ka kompanya ang gitumbok nga nalambigit sa pyramiding scam, patungan og kasong anti-cybercrime law human nasuta nga online ang kadaghanang mga transaksyon niini.

Nasayran nga gironda sa mga awtoridad pinasikad sa search warrant ang buhatan sa Organico Agribusiness Ventures Corporation sa may Brgy. Mabolo, Dakbayan sa Sugbo ug ang Ada Farm Agriventures sa dalan M.C. Briones sa Dakbayan sa Mandaue niadtong Martes. Apan wala na maabti ang mga tigdumala ug mga empleyado niini.

Sa maong search warrant, giila ang branch manager sa Organico nga si Cerrone Roial Posas ug ang sales agent niini nga silang Gabby Rivera de Ocampo-Catala ug Elsi Lestino.

Samtang sa Ada Farm, ang tag-iya giila nga si Adrian Dominic Ang, si Elmer Penierre ang operations manager ug usa ka Dino Estrosas nga ahente niini.

Ang hepe sa Criminal Investigation and Detection Group (CIDG-7) nga si Police Colonel Lito Patay nagkanayon nga atol sa ilang pagpangronda, gawas sa mga computer sets, nakakuha sab sila og mga internet router.

Nagpasabot kini nga migamit og internet ang maong kompanya sa ilang mga transaksyon nga ilang giila nga ilegal sanglit wala sila mokuha og secondary permit gikan sa Securities and Exchange Commission (SEC) labot sa gipangdalit nila nga investment sa publiko.

Duda nila nga bisan og wala na sa opisina ang maong mga personalidad, nagpadayon gihapon ang ilang transaksyon pinaagi sa online. Ang mga computer ug uban pang nakuha sa kapolisan sa buhatan sa naasoy nga mga kompaniya, maoy magsilbing ebidensya batok sa duha ka mga kompanya.

Sa Bohol, wala nay tawo ug limpyo na dihang gisilbihan sab og search warrant sa kapolisan ang branch sa Organico didto sa dalan Gallares sa Dakbayan sa Tagbilaran, dungan sa pagronda dinhi sa Sugbo. Sigon sa direktor sa Police Regional Office-7, Police Brigadier General Debold Sinas nga sayo pa lang, adunay naka-tip sa maong buhatan.

Subay niini, dili na mapasakaan og kaso ang gituohang mga tagdumala sa maong branch.

Samtang, giingong aduna pay laing tulo ka mga kompanya sa pyramiding scam nga nag-operate dinhi sa Sugbo ug mao nasab ni ang subject nga rondahon sa sunod nga mga adlaw.

Sa laing bahin, nanawagan si Patay sa publiko nga dili unta magpailad sa maong mga kompanya nga mohatag og dagkong porsiyento nga tubo sa kuwarta sanglit imposible kini. (/DILT)(BANATNEWS)