Mobalhin og partido pasilutan

CEBU, Philippines — Gihimug-atan sa committee on laws, ordinances, and styling sa konseho sa Siyudad sa Sugbo nga nasubay sa balaud ang giduso nga anti-turncoatism ordinance.

Matud pa nga dunay gahum ang konseho sa siyudad sa pagpalabang niini.

Ang komitiba gilangkuban sa mga konsehal nga sakop sa Bando-Osmeña Pundok Kauswagan (BOPK) nga gipangulohan ni Konsehal Sisinio Andales ug Konsehal Eugenio Gabuya Jr. isip vice-chairperson.

Mga konsehal nga sila si David Tumulak, Alvin Arcilla ug Joy Augustus Young maoy mga miyembro.

Kahinumduman nga niadtong Abril 23, ang oposisyon nga si Konsehal Renato Osmeña Jr., amahan sa maong ordinansahon, nakahukom nga itugyan una sa komitiba nga maoy motuon niini.

Ang komitiba nisugyot nga mopahigayon og public hearing aron sa pagpaminaw sa ubang ahensya sa gobiyerno karong Hunyo 11.

Gidapit sa komitiba ang Commission on Elections (Comelec), Department of Interior and Local Government (DILG), ug Integrated Bar of the Philippines-Cebu City Chapter.

“First, we must define carefully a political party. Is there a political party locally? That’s part of the constitutional right of a person to choice his group or association or party of his liking. No constitutional prohibition, why prohibit locally?” sumala pa ni Andales.

Sa higayon nga mapasar ang giduso nga ordinansa, ang titulo niini mao ang Anti-Turncoatism Ordinance of 2019 nga silotan ang mga opisyal nga mobalhin og party affiliation sa sulod sa ilang termino.

Si Osmeña niingon usab nga pinaagi sa maong ordinansa, ang mga konsehal makat-on sa pag-unong sa ilang tagsa-tagsa ka partido.

“WHEREAS, absent a national law to this effect notwithstanding, this legislative body must take the cudgel for political reforms by taking one bold step to at least discourage turncoatism by imposing administrative sanctions for its commission,” kabahin sa gisugyot nga ordinansahon.

Si Osmeña nagbutang og administrative nga silot alang sa pinili nga mga konsehal sama sa bisan unsa nga mga magbabalaud nga makahukom sa pagbalhin og party affiliation sa panahon sa tulo ka tuig nga termino sa opisina dili angayan sa paghupot sa chairmanship o membership sa tanan nga komitiba sa konseho.

Sama sa maong silot ang ipahamtang ngadto sa usa ka sakop gikan sa minority bloc, lakip na ang mga independente nga konsehal nga moduyog sa majority bloc ug ang mga nawad-an sa ilang partido.

Kadtong gitudlo nga mga opisyal sama sa ex-officio nga mga miyembro, Sangguniang Kabataan Federation (SKF) president ug Association of Barangay Councils (ABC) president, walay labot sa maong balaud. Ang gisugyot nga ordinansa gituyo lang alang sa mga pinili nga konsehal sa habagatan ug amihanang distrito sa siyudad. (/GMR)(BANATNEWS)