Department of energy may oil exploration sa Norte

CEBU, Philippines – Gipahibawo sa Department of Energy nga human sa malampuson nga oil exploration sa Lungsod sa Alegria, aduna na sab silay gihimo karon nga laing oil exploration nga nahimutang sa amihanang bahin sa Lalawigan sa Sugbo.

Kini ang gitug-an ni Jesus Tamang, director sa Energy Resource Development Bureau sa DOE. Ang kompaniya nga Forum Exploration maoy nipahigayon karon sa exploration diin adunay onshore ug offshore.

Ang mga gihimoan sa exploration naglangkub sa Maya sa Lungsod sa Daanbantayan ug Dakbayan sa Bogo diin dili na kini bag-o kay aduna naman kini natural gas nga nakuha sa maong lugar sulod na sa pipila ka tuig.

Ang DOE malaumon nga makakuha sa amihanang bahin ilabi na nga maayo ang produksyon sa Alegria nga gituohan mabaligya unya kini sa local market.

Sumala pa ni Tamang nga tulo gikan sa siyam ka tabay ang adunay oil source human kini gi-drill ug aduna usab natural gas nga nakita sa maong dapit.

Samtang giklaro usab sa DOE nga dunay tukma nga power ang Visayas Region alang sa mosunod nga lima ka tuig tungod sa mga umaabot nga proyekto nga anaa na sa pipeline nga magpuno ug dili mominus 3,797 megawatts sa grid.

Matud ni Energy Undersecretary Felix William Fuentebella nga 80 porsyento sa maong proposed projects ang renewable energy resources nga nahimutang sa Leyte ug Negros Island.

Gibutyag usab ni Fuentebella nga ang Visayas Grid nakasinati usab og yellow alert panahon sa peak hours gikan alas 7 sa gabii ngadto sa alas 9 sa gabii. (/GMR)(BANAT NEWS)